Qazaqstanda Abaı esimin 19 myńǵa jýyq adam ıelengen, onyń toǵyzy — áıelder. 10 tamyzda atap ótiletin Abaı kúnine oraı Ulttyq statısıka búrosy osyndaı erekshe statısıkany jarıalady, dep habarlaıdy infohub.kz saıty.
El boıynsha barlyǵy Abaı esimimen 18 961 adam tirkelgen. Bul esim eń kóp Astana turǵyndary arasynda kezdesedi — munda 2 186 Abaı turady. Túrkistan oblysynda mundaı esimmen 2 008 adam, Almatyda — 1 740 adam bar.
Qazaqstandaǵy eń jasy úlken Abaı 1932 jyly dúnıege kelgen. Eń kóp taralǵan jas toby — 30-34 jas: bul topqa 3 267 adam kiredi.
Sonymen qatar, bul esim jas ata-analar arasynda suranysqa ıe bolyp qalýda. 2026 jyldyń alǵashqy alty aıynda Abaı esimimen 91 náreste atalǵan.
«Esim dástúrli túrde erlerge arnalǵan bolyp sanalǵanymen, Qazaqstanda Abaı esimimen toǵyz áıel tirkelgen», — dep habarlady Ulttyq statısıka búrosy.
Vedomstvo sondaı-aq Ibrahım esimimen (Ibragım jáne Ibrahım nusqalaryn qosa) qazaqstandyqtardy sanap shyqty. Elde mundaı adamdar sany 37 844.
Abaıdyń esimi Qazaqstan kartasynda da bekigen. Aqynnyń qurmetine oblys, qala, úsh aýdan jáne 26 aýyl atalǵan.
Buǵan deıin «Kýrsıv» 10 tamyzda Qazaqstanda Abaı kúni atap ótiletinin habarlaǵan bolatyn. Mádenıet jáne aqparat mınıstrliginiń derekterine sáıkes, osy kúnge oraı el boıynsha 350-den astam mádenı, ǵylymı, bilim berý jáne sporttyq is-shara josparlanǵan. Merekelik sharalar Astana, Almaty, Semeı, Shymkent jáne basqa da óńirlerde, sondaı-aq shetelde ótedi.