InfoHub Logo

Úılengennen beri úıiniń berekesi ketip, jigit ákesi úshin áıelimen jıi ursysatyn boldy. Áıeli qaıyn atasyn jaqtyrmaı, úıdiń artyq adamyndaı kóretin edi. Urys-kerister keıde ýshyǵyp ketetin. Tipti bir kezde áıeli julqynyp:«Bul úıde ne men qalamyn, ne ákeń qalsyn!» dep qaǵyndy. Alaıda, jigittiń áıelimen ajyrasatyn oıy joq edi. Tek urys-keris bolmasa... onyń aırandaı uıyǵan otbasy, súıikti jary, botaqany bar! Úılener aldynda eshkimge qulaq aspaǵan edi. Ata-anasyn kóndirý úshin qandaı qıynshylyqtar kórse de, áıelin qatty jaqsy kóretin edi. Sharasyz kúıde júrip, bir jolyn tapty-aý, áıteýir. Jyldar buryn ańshylyqpen aınalysyp júrip, taý jaqta saldyrtqan úıshigi esine túsip, sonda ákesin ornalastyrýdy uıǵardy. Aptasyna bir kelip, kerek-jaraqtaryn qamtamasyz etip, osylaısha bul daýdan qutylamyn dep oılady. Ákesine qajetti zattardy alyp, tósek tartyp jatqan ákesin kóterip, mashınasyna  atqyzdy. Alpamys balasy: «Áke mende sizdermen baraıynshy?» dep jylap turyp aldy. Ákesi ony da mashınaǵa otyrǵyzyp, úsheýi uzaq jolǵa shyqty. Dala qara sýyq, qaqaǵan qystyń ortasy. Qar borap tur. Borannan mashınanyń júrýi qıyndaı tústi. Kishkentaı Alpamys ákesinen: «Áke biz qaıda baramyz?» dep surasa da, esh jaýap ala almady. Alaıda qaıda bara jatqanyn túsingen atasy bildirtpeı kóz jasyn súrtip otyrdy.

Uzaq ýaqytqa sozylǵan sapardan keıin taýdaǵy úıshikke de kelip jetti. Kópten beri qaraýsyz qalǵan úıshik azyp-tozyp ketipti. Jigit onyń bir buryshyn tazartyp, mashınamen alyp kelgen tósekterin sol jerge tósep berdi. Sosyn qalǵan zattaryn tasyp, eń sońynan ákesin ákelip, shalqasynan tósekke jatqyzdy. Úıshiktiń ishi azynap tur. Ákesi sol mezette dirdektep tońa bastady. Jigit ákesine sharasyzdan qarap, erteń qalyń kórpe-tósekter ákep beremin dep oılady. Basyna qara aspan tóngendeı kóńilsiz edi. Ol osyndaı sezimderdi basynan keshkende, ákesiniń de júregine pyshaq suqqandaı sezimde edi. Kishkentaıdan asyrap baqqan uly ony óz qolymen taýdaǵy úıshikke tastap ketip bara jatyr. Syrtynan bildirmese de, ishinen órtenip janyp bara jatyr, biraq bildirtpeýge tyrysýda. Al kishkentaı Alpamys eshteńege túsinbeı, túsiniksiz jaǵdaıda atasymen qoshtasatynyna senbeı tur. Mine, qaıtatyn ýaqyt ta jaqyndady. Jigit ákesine ıilip, betterinen, qoldarynan qaıta-qaıta súıdi. Meni keshir degendeı, moınynan qushaqtap ıiskedi. Endi ekeýi de eriksiz kózden jas alyp jylap jiberdi. «Osyǵan májbúrmin» degen kózben ákesine qarady da Alpamystyń qolynan ustap, jyldam úıshikten shyǵyp ketti. Mashınaǵa mindi. Alpamys jolda ketip bara jatyp «Nege atamdy sýyq jerge tastap kettik» dep jylaı bastady. Oǵan jaýap bere almady, «Anańnyń qalaýy da osy edi», dep aıta almady. Alpamys: «Áke, siz qartaıǵanda men de sizdi osy jerge ákelemin be?» degen kezde kókiregi qars aıyryldy. Bul suraqtyń ózi bir dáleldeı boldy. Mashınany buryp artqa qaıtty. Úıshikke jeter jetpes «Meni keshir, áke!» dep ákesiniń moınyna asyla ketti. Ákesi men balasy bir-birin qapsyra  qushaqtap, óksip-óksip jylap jiberdi. Jigit: «Áke meni keshir! Seni osyndaı halge  túsirgenime, meni keshir!» dep qateligin moıyndady. Ákesi de balasynyń sózderine bylaı dep ádemi jaýap qatty: «Qaıtip keletińdi bilip edim, balam! Men óz ákemdi taýdyń basyna bulaı tastap ketpep edim, sen qalaısha meni tastap ketpeksiń.. Meni bulaı tastap kete almaıtynyńdy bilgen edim.»

---