Aqmola oblysynda sot emhanadan pasıenttiń paıdasyna dárigerlerdiń dıagnostıka men emdeýde jibergen qatelikteri úshin 1,6 mln teńgeden astam somany óndirip berdi, dep habarlaıdy infohub.kz saıty.
Aqmola oblysy sottarynyń resmı Telegram-arnasynda habarlanǵandaı, alqa pasıenttiń Selınograd aýdandyq emhanasy men úsh dárigerge qatysty joǵaltqan tabysyn, emdeý shyǵyndaryn jáne moraldyq zıannyń ótemaqysyn óndirý týraly talap aryzy boıynsha azamattyq isti qarady.
Birinshi satydaǵy sottyń sheshimimen talap ishinara qanaǵattandyryldy. Talapkerdiń paıdasyna emhanadan 700 myń teńge kóleminde moraldyq zıannyń ótemaqysy óndirildi, al joǵaltqan tabys pen emdeý shyǵyndaryn óndirý týraly talaptyń qanaǵattandyrylýynan bas tartyldy.
Oblystyq sot alqasy mynany anyqtady. 2025 jyldyń shildesinde JSHS-te mehanızator bolyp jumys isteıtin talapker bas aýrýy, jótel, murynnyń bitelýi, dene qyzýynyń joǵarylaýy, ıyqtyń aýyrýy sıaqty shaǵymdarmen aýdandyq emhanaǵa júgindi. Dıagnoz qoıyldy: JRVI, jedel nazofarıngıt, órshý satysyndaǵy sozylmaly bronhıt, polısegmentarly pnevmonıa.
Birneshe kúnnen keıin er adam qoldary men ıyq býynynyń aýyrýy jáne isinýi týraly shaǵymdarmen emhanaǵa qaıta júgindi. Dárigerlerdiń biri revmatoıdty artrıt dıagnozyn qoıyp, travmatologtyń keńesin usyndy. Travmatolog ıyq býynynyń baılamdarynyń sozylýy, shamadan tys kerneýi degen dıagnoz qoıdy. Úshinshi dáriger travmatologtyń dıagnozyn qaıtalady.
Bir aptadan keıin talapker shuǵyl túrde Astanadaǵy aýrýhanaǵa jatqyzyldy, onda oǵan sol jaq joǵarǵy aıaqtyń, ıyq asty jáne ıyq ústi aımaqtarynyń flegmonasy dıagnozy qoıyldy. Shuǵyl hırýrgıalyq operasıa jasalyp, shamamen 1,5 lıtr iriń soryp alyndy.
Qate qoıylǵan dıagnoz ben emdeýdiń saldarynan densaýlyqqa uzaq ýaqyt eńbekke jaramsyzdyqpen zıan keltirildi. Saraptama komısıasynyń qorytyndysy boıynsha, aýdandyq emhananyń dárigerleri qatelikter jibergen: dıagnostıkany ýaqtyly júrgizbeý, taldaýlar men zertteýlerdi elemeý, bul gematoma men flegmonanyń damýyna ákelip soqty, nátıjesinde hırýrgıalyq aralasýǵa, ıyq býynynyń fýnksıasynyń buzylýyna ákeldi.
Komısıanyń qorytyndysymen medısına qyzmetkerleriniń áreketteri men keltirilgen zıan arasyndaǵy sebeptik baılanys anyqtaldy: pasıenttiń shaǵymdaryna tıisti kóńil bólinbegen, anamnez ústirt jasalǵan, qoıylǵan dıagnoz tolyq emes.
Alqa qaýlysymen birinshi satydaǵy sottyń sheshimi joǵaltqan tabys somasyn óndirý týraly talapty qanaǵattandyrýdan bas tartý bóliginde ózgertilip, jańa sheshim qabyldandy. Alqa emhanadan pasıenttiń paıdasyna 914 myń teńge kóleminde joǵaltqan tabys somasyn óndirdi, óıtkeni ol uzaq ýaqyt eńbekke jaramsyzdyq paraǵynda boldy. Qalǵan bóliginde sot sheshimi ózgerissiz qaldy.
Emdeý shyǵyndaryn (dári-dármek satyp alý) óndirýden bas tartyldy, óıtkeni bul shyǵyndardy saqtandyrý kompanıasy jabady. Sot aktileri zańdy kúshine endi.