Aqmola oblysynda sot Selınograd aýdandyq emhanasynyń dárigerleri birneshe ret qate dıagnoz qoıyp, flegmonanyń damýyn jiberip alǵan mehanızatordyń paıdasyna sheshim shyǵardy. Nátıjesinde medısınalyq mekeme zardap shekkenge moraldyq zıan úshin 700 myń teńge jáne uzaq ýaqyt eńbekke jaramsyzdyǵy úshin 900 myń teńgeden astam ótemaqy tóleýge mindetteldi, dep habarlaıdy infohub.kz.
Aqmola oblystyq soty qazaqstandyqtyń aýdandyq emhananyń úsh dárigerine qatysty talap aryzyn qarady. Tekserý barysynda dárigerlerdiń áreketteri shuǵyl ota jasaý qajettiligine ákelgeni anyqtaldy.
Sot 2025 jyldyń shildesinde JSHS mehanızatory emhanaǵa bas aýrýy, jótel, murynnyń bitelýi, dene qyzýynyń joǵarylaýy jáne ıyqtaǵy aýyrsyný shaǵymdarymen júgingenin anyqtady. Alǵashynda oǵan JRVI, jedel nazofarıngıt, sozylmaly bronhıttiń órshýi jáne polısegmentarly pnevmonıa dıagnozy qoıyldy.
Alaıda birneshe kúnnen keıin pasıent dárigerlerge qaıta keldi, biraq bul joly qoldary men ıyǵynyń aýyrýy men isinýine shaǵymdandy. Bul joly dáriger «revmatoıdty artrıt» dıagnozyn qoıyp, travmatologqa keńes alýdy usyndy. Travmatolog óz kezeginde ıyq býynynyń baılamdarynyń sozylýy men shamadan tys júktemesin anyqtady, al úshinshi dáriger onyń qorytyndysyn qaıtalady.
«Bir aptadan keıin pasıent Astana qalasynyń aýrýhanasyna shuǵyl jatqyzyldy, onda oǵan sol jaq joǵarǵy aıaqtyń, ıyq asty jáne ıyq ústi aımaqtarynyń flegmonasy dıagnozy qoıyldy. Shuǵyl hırýrgıalyq ota jasalyp, shamamen 1,5 lıtr iriń soryp alyndy», – delingen habarlamada.
Saraptama komısıasynyń qorytyndysy boıynsha, aýdandyq emhananyń dárigerleri ýaqtyly dıagnoz qoımaý jáne taldaýlar men zertteýlerdi elemeý sıaqty birqatar qatelikter jibergen. Bul gematomanyń paıda bolýyna jáne flegmonanyń damýyna, al sońynda ıyq býynynyń qyzmetiniń buzylýyna ákeldi.
Birinshi satydaǵy sottyń sheshimimen pasıenttiń talaby ishinara qanaǵattandyryldy: moraldyq zıan úshin 700 myń teńge ótemaqy óndirildi, al joǵaltqan tabys pen emdeý shyǵyndaryn óndirý týraly talaptar qanaǵattandyrylmady.
Alaıda apelásıalyq alqa isti qaıta qarap, emhanadan pasıent uzaq ýaqyt eńbekke jaramsyz bolǵandyqtan, joǵaltqan tabys somasyn 914 myń teńge kóleminde qosymsha óndirdi. Qalǵan bóliginde sot sheshimi ózgerissiz qaldy.