Aqmola oblysynda polısıa qyzmetkerleri sırek kezdesetin oqıǵaǵa tap boldy: trassada túsi, markasy jáne memlekettik tirkeý nómirleri birdeı eki júk kóligi toqtatyldy. Bul týraly infohub.kz saıty habarlaıdy.
Oblystyq polısıa departamentiniń baspasóz qyzmeti málimdegendeı, oqıǵa 15 qyrkúıekte Astana — Qaraǵandy — Almaty avtojolynyń 29-shaqyrymynda bolǵan. Patrúldeý kezinde polıseıler bir tústi, bir modeldi eki Shacman júk kóligin baıqaǵan. Alaıda eń tańǵalarlyǵy — eki kólikke de birdeı memlekettik tirkeý nómirleri ornatylǵan.
Aqmola oblysy PD patrúldik polısıa rotasynyń 1-vzvod komandıri Jangeldi Álibekov mundaı oqıǵamen alǵash ret kezdeskenin aıtty.
Birinshi kólikti tekserý kezinde eshqandaı zańbuzýshylyq anyqtalmady, al ekinshisinde úlken máseleler týyndady. Memlekettik tirkeý nómiri kóliktiń VIN-kodyna sáıkes kelmegen. Sonymen qatar, kólik múlde tirkelmegen.
Júrgizýshi Astana turǵyny bolyp shyqty. Ol kólik ózine tıesili emes, tek júrgizýshi bolyp jumys isteıtinin túsindirdi. Tekserý barysynda tirkelmegen kólikke jalǵan memlekettik tirkeý nómiri ornatylyp, odan keıin onymen júre bergeni anyqtaldy.
Osy fakti boıynsha sot ótti. Júrgizýshige úsh táýlik ákimshilik qamaý jazasy taǵaıyndalyp, bir jylǵa kólik basqarý quqyǵynan aıyryldy. Kólik ıesine qatysty jalǵan memlekettik tirkeý nómirin ornatqany úshin ákimshilik materıal da jasaldy.