Aqtaý portynda Kaspı teńiziniń túbin 6–7 metrge deıin tereńdetý jumystary bastaldy. Kólik mınıstrliginiń túsindirýinshe, bul Transkaspı halyqaralyq kólik dálizi (THKD) boıynsha tasymal kólemin arttyrý úshin qajet, dep habarlaıdy infohub.kz saıty.
Jumystardyń bastalýyna sý qoımasy deńgeıiniń tómendeýi jáne Transkaspı halyqaralyq kólik dáliziniń tıimdiligin arttyrý qajettiligi sebep boldy.
Jumys barysynda shamamen 1,3 mln tekshe metr topyraq alynady. Nátıjesinde sý aıdynynyń tereńdigi 6–7 metrge jetýi tıis. Túbin tereńdetý porttyń ótkizý qabiletin arttyryp, THKD boıynsha tasymal kólemin 30%-ǵa deıin ulǵaıtýǵa múmkindik beredi. Sonymen qatar tasymal quny 10–15%-ǵa tómendeıdi dep kútilýde.
Jobany júzege asyrý portty damytýǵa ınvestısıa tartýǵa jáne teńiz júzý qaýipsizdigin arttyrýǵa yqpal etedi. Merdiger jumys kestesin ázirlep qoıdy. Aǵymdaǵy máselelerdi jedel sheshý jáne qatysýshylardyń is-qımylyn úılestirý úshin jumys keńesteri turaqty túrde ótkizilip tur. Túbin tereńdetý jumystaryn jyl sońyna deıin aıaqtaý josparlanýda.
Buǵan deıin Qazaqstan Kaspı túbimen munaı qubyryn salý múmkindigin zertteıtini habarlanǵan bolatyn.