Aqtóbe oblystyq kópbeıindi aýrýhanasy mamandandyrylǵan kómek túrlerin keńeıtýdi jalǵastyrýda. Revmatologıadan keıin munda gastroenterologıa jáne nefrologıa bólimsheleri jumys isteı bastady, dep habarlaıdy infohub.kz saıty.
Klınıka basshysy Qaırat Jetibaevtyń aıtýynsha, kezeń-kezeńmen júrgizilgen jańartý stasıonarlyq em kólemin 5,5%-ǵa arttyrýǵa múmkindik berdi. Jańa baǵyttardyń engizilýi oblys turǵyndary úshin shuǵyl jáne josparly terapıalyq kómektiń qoljetimdiligin aıtarlyqtaı arttyrady.
«Bul bólimsheler asqazan-ishek joldary men búırek aýrýlary bar naýqastarǵa zamanaýı dıagnostıka, emdeý jáne kásibı baqylaý alýǵa kómektesedi», — delingen ákimdik habarlamasynda.
Jańartý aıasynda munda palatalar jańartylyp, naýqastarǵa qolaıly jaǵdaı jasalyp, qajetti qural-jabdyqtar satyp alyndy. Eske salaıyq, bıylǵy jyldyń qańtarynda aýrýhanada 16 tósektik revmatologıa bólimshesi ashylǵan bolatyn. Sonymen qatar, medısınalyq uıymda telemedısına ortalyǵy jumys isteıdi, sondaı-aq radıologıalyq zertteýlerdi ortalyqtandyrý úshin PACS júıesi engizilgen.
«Jańa bólimshelerdiń ashylýy medısınalyq kómektiń qoljetimdiligin arttyryp, dıagnostıka men emdeý múmkindikterin keńeıtedi», — dep atap ótti Jetibaev. Onyń aıtýynsha, jańartý baǵdarlamasy aıasynda aýrýhananyń medısınalyq ınfraqurylymyn odan ári kezeń-kezeńmen jańartý josparlanýda.
Buǵan deıin densaýlyq saqtaýdy jańǵyrtý aıasynda respýblıkada qaıtarylǵan aktıvter esebinen jalpy somasy 176,8 mlrd teńgege 191 joba maquldanǵany habarlanǵan bolatyn. Sondaı-aq, densaýlyq saqtaý mınıstrligi jańǵyrtý baǵdarlamasy aıasynda ótken jyldyń sońyna qaraı elde alǵashqy medısınalyq-sanıtarlyq kómektiń 655 josparlanǵan nysany salynǵanyn málimdegen edi.