Áleýmettik jelilerde Aqtóbe sý qoımasynyń jaǵasynda óli balyq pen qustardyń óleksesi túsirilgen vıdeo tarady. Osydan keıin ekologtar sý sapasyn tekserýge kiristi, dep habarlaıdy infohub.kz saıty.
Aqtóbe turǵyny Aıgerim Turlan Instagram-da vıdeo jarıalap, Aqtóbe sý qoımasynyń jaǵasyna óli balyq pen qustardyń óleksesi shyǵyp qalǵanyn málimdedi.
Bul jazbaǵa Aqtóbe oblysy ekologıa departamenti jaýap berdi. «Aqtóbe sý qoımasynda ólgen qustar men balyqtar tabylǵan fakti boıynsha jumys toby quryldy. Onyń quramyna departament mamandary, Aqtóbe oblystyq orman sharýashylyǵy jáne janýarlar dúnıesi ınspeksıasynyń, tabıǵı resýrstardy basqarý jáne tabıǵatty paıdalanýdy retteý basqarmasynyń, Tobyl-Torǵaı oblysaralyq baseındik balyq sharýashylyǵy ınspeksıasynyń, «Qazgıdromet» RMK Aqtóbe oblystyq fılıalynyń, Veterınarlyq baqylaý jáne qadaǵalaý komıteti aýmaqtyq ınspeksıasynyń mamandary, sondaı-aq Aqtóbe qalalyq veterınarlyq stansıasynyń ókilderi kirdi», — dedi vedomstvo.
29 qyrkúıekte jumys toby Aqtóbe sý qoımasynda ólgen qustar men balyqtar tabylǵan jerge bardy. «Kórsetilgen jerden veterınarlyq ınspeksıa mamandary zerthanalyq taldaý men zertteý júrgizý úshin tórt qustyń (shaǵalanyń) óleksesin aldy. Alaıda beınejazbada kórsetilgen óli balyq (bir dana) men sýdan alynǵan shaǵalanyń óleksesi tabylmady», — dedi departamentte.
Mamandardyń aldyn ala qorytyndysy boıynsha, alynǵan tórt qustyń óleksesi kebýine, jumsaq tinderiniń bolmaýyna jáne basqa da jaǵdaılarǵa baılanysty zerthanalyq taldaý men zertteý júrgizýge jaramsyz bolýy múmkin. «Basqa qustar men balyqtardyń ólgeni nemese jappaı qyrylǵany týraly faktiler tirkelmegenin atap ótken jón», — dedi Ekologıa departamentinde.
Jumys toby Aqtóbe sý qoımasynyń úsh núktesinen sý synamasyn aldy: Aqtóbe — Qandyaǵash avtomobıl jolynyń 14-shaqyrymy aýdanynda; 41-razezdegi qus fabrıkasynyń mańynda; Aqtóbe sý qoımasynyń tómengi befinde.
«Alynǵan sý synamalaryna zerthanalyq taldaý men zertteýdi departamenttiń synaq zerthanasy jáne «Qazgıdromet» RMK Aqtóbe oblystyq fılıalynyń tabıǵı ortanyń lastanýyn monıtorıńileý keshendi zerthanasy júrgizedi. Zertteý merzimi — bes jumys kúni, 6 qazanǵa deıin», — dedi vedomstvo.
Sonymen qatar Ekologıa departamenti «Qazgıdromet» RMK oblystyq fılıaly Aqtóbe sý qoımasynda sý sapasyna memlekettik ekologıalyq monıtorıńti aı saıyn júrgizetinin habarlady. «Sý synamasy úsh núkteden alynady: Elek ózeninen, Alǵa qalasynan 15 km tómen (sý qoımasynan joǵary), tikeleı sý qoımasynan, sondaı-aq Sılıkat zaýytynyń aýdanynda (sý qoımasynan tómen). 2025-2026 jyldardaǵy taldaý nátıjeleri boıynsha sýdyń joǵary jáne asa joǵary lastaný faktileri tirkelgen joq. Jumys tobynyń nátıjeleri týraly qosymsha habarlanatyn bolady», — dedi Ekologıa departamentinde.