Alaıaqtar qazaqstandyqtarǵa joǵaltqan aqshalaryn qaıtarýǵa ýáde berip, aldaýdyń jańa tásilin oılap tapty. infohub.kz saıtynyń habarlaýynsha, qylmyskerler Qazaqstan Respýblıkasynyń Qarjy naryǵyn retteý jáne damytý agenttigi (ARRFR) atynan jalǵan qujattar taratýda.
Vedomstvonyń baspasóz qyzmetinde agenttik azamattarǵa aqsha qaıtarý rásimin, krıptovalúta bırjalaryndaǵy, krıptoámıandardaǵy jáne bank kartalaryndaǵy tranzaksıalardy tekserýdi, sondaı-aq aqsha qaıtarý boıynsha zańgerlik jáne ózge de qyzmet kórsetetin tulǵalardyń senimdiligin rastaýdy júrgizip jatqany týraly jalǵan aqparaty bar qujattyń taralý jaǵdaılary anyqtalǵanyn aıtty.
ARRFR taratqan qujat resmı emes ekenin, ondaǵy barlyq aqparat shyndyqqa sáıkes kelmeıtinin atap ótti. Agenttik azamattarǵa alaıaqtyq nemese ózge de operasıalar saldarynan joǵaltqan qarajatty qaıtarý rásimderin júrgizbeıdi jáne mundaı qyzmetterdi usynatyn úshinshi tulǵalardyń senimdiligin rastamaıdy.
Osyǵan baılanysty azamattardy Agenttik nemese basqa memlekettik organdar atynan kelip túsetin qujattarǵa, hattarǵa jáne habarlamalarǵa saq bolýǵa shaqyrady. Belgisiz adamdardyń talaptary boıynsha aqsha aýdarýǵa, sondaı-aq úshinshi tulǵalarǵa jeke derekterdi, bank kartalarynyń derektemelerin, SMS-kodtardy, parо́lderdi jáne ózge de qupıa aqparatty berýge bolmaıdy.
Eger sizge osyndaı qujattar nemese aqsha qaıtarý syltaýymen komısıalardy, saqtandyrý jarnalaryn nemese ózge de tólemderdi tóleý talaptary kelip tússe, tólem jasamańyz jáne quqyq qorǵaý organdaryna habarlasyńyz.