Qazaqstannyń birinshi raketkasy Aleksandr Býblık apta basynda Kásibı tenısshiler qaýymdastyǵynyń (ATP) Top-20 reıtıńinen shyǵyp qaldy. Endi ol erteń Londonda ótetin Leıver kýbogi-2026 aıasynda álem quramasy sapynda eki mach ótkizedi, dep habarlaıdy infohub.kz saıty.
Álem quramasynyń Eýropa quramasyna qarsy londondyq machyna Býblık komanda kapıtany Andre Agassıdiń jeke shaqyrtýymen qatysyp otyr. Erteń Aleksandr kortqa eki ret shyǵady. Jekeleı synda ol Rafael Hodarmen, al juptyq razrádta (Teılor Frıtspen birge) Karlos Alkaras pen Iakýb Menshıkke qarsy oınaıdy.
Býblıktiń eki machynan bólek, týrnırdiń birinshi kúni Kasper Rýýd Franchesko Cherýndolomen, al Menshık Brendon Nakashımamen kezdesedi.
Ataqty avstralıalyq tenısshi Rod Leıverdiń (qazir 88 jasta) qurmetine atalǵan Leıver kýbogi toǵyzynshy ret ótkizilip otyr. Oǵan alty eýropalyq tenısshi jáne qalǵan álemdi tanystyratyn sonsha sportshy qatysady. Úsheýi ATP reıtıńi boıynsha avtomatty túrde iriktelse, taǵy úsheýin kapıtan shaqyrady.
Úsh kún ishinde 12 mach (9 jekeleı jáne 3 juptyq) oınalady. Birinshi kúngi ár oıyndaǵy jeńis komandaǵa 1 upaı ákeledi. Ekinshi kúngi machtardaǵy ár jeńis 2 upaımen baǵalanady. Úshinshi kúni jeńistiń quny úsh upaıǵa deıin kóteriledi.
13 upaıdy birinshi jınaǵan komanda jeńiske jetedi. Esep 12:12 bolǵan jaǵdaıda jeńimpazdy qosymsha juptyq mach anyqtaıdy.
Barlyq mach úsh setten oınalady, al úshinshi set 10 upaıǵa deıingi taı-breık formatynda ótedi.
Kórmelik dep ataýǵa tolyq negizi bar týrnır úshin ATP reıtıńine upaı berilmeıdi. Soǵan qaramastan barlyq tenısshi jeke tólem alady. Al jeńgen komandanyń ár múshesi bank shotyna qosymsha 250 myń dollar qosady.
Týrnır negizi qalanǵannan beri Praga (2017), Chıkago (2018), Jeneva (2019), Boston (2021), London (2022), Vankýver (2023), Berlın (2024) jáne San-Fransısko (2025) qalalarynda ótti. «Eýropanyń» enshisinde ázirge bes jeńis bar, «álem» úsh ret jeńiske jetken.