Leıver kýbogynda tuńǵysh ret oınaǵan Qazaqstannyń birinshi raketkasy Aleksandr Býblık bir keshte eki ret jeńilis tapty, dep habarlaıdy infohub.kz saıty.
Álem quramasy sapynda óner kórsetken qazaqstandyq tenısshi aldymen ıspanıalyq Rafael Hodarǵa – 2:6, 3:6 esebimen jol berdi. Keıin amerıkalyq Teılor Frıtspen juptasyp, Karlos Alkaras (Ispanıa)/Iakýb Menshık (Chehıa) tandemine – 4:6, 4:6 esebimen utyldy.
Eýropa men álemniń qalǵan bóligi arasyndaǵy kórsetilim machynyń birinshi kúninen keıin Eski dúnıe tenısshileri – 3:1 esebimen alda tur.
Ataqty avstralıalyq tenısshi Rod Leıverdiń (qazir 88 jasta) qurmetine atalǵan Leıver kýbogy toǵyzynshy ret ótkizilip otyr. Oǵan alty eýropalyq tenısshi jáne álemniń qalǵan bóligin bildiretin sonsha sportshy qatysady. Úsheýi ATP reıtıńi boıynsha avtomatty túrde iriktelse, taǵy úsheýin kapıtandar shaqyrady.
Úsh kún ishinde 12 mach (9 jeke jáne 3 juptyq) oınalady. Birinshi kúndegi ár oıyndaǵy jeńis úshin komanda 1 upaı alady. Ekinshi kúndegi machtardaǵy ár jeńis 2 upaımen baǵalanady. Úshinshi kúni jeńistiń quny úsh upaıǵa deıin kóteriledi. 13 upaıdy birinshi jınaǵan komanda jeńiske jetedi.
Barlyq mach úsh setke sozylady, al úshinshi set 10 upaıǵa deıingi taı-breık formatynda oınalady.
«Eýropanyń» enshisinde ázirge bes jeńis bar, «álem» úsh ret jeńiske jetken.