Almatyda kólik júktemesin eskere otyryp, komýnaldyq turaqtardy tarıfteýdiń jańa júıesi usynylyp otyr. Bul týraly qala ákimdigi habarlady, dep jazady infohub.kz saıty.
Joba turǵyndarǵa turaq oryndarynyń qoljetimdiligin arttyryp, kóshe-jol jelisiniń eń suranysqa ıe ýchaskelerindegi keptelisti azaıtýǵa baǵyttalǵan.
Aıta keteıik, komýnaldyq aqyly turaqtardaǵy saǵatyna 100 teńgelik qoldanystaǵy tarıf 2016 jyldan beri ózgermegen jáne 10 jyl boıy qaıta qaralmaǵan. Osy ýaqyt ishinde Almaty qalasynda júretin kólik sany 1 mln birlikten asyp, joldar men turaq keńistigine salmaq aıtarlyqtaı artqan.
Almaty qalasynyń jol qozǵalysyn uıymdastyrý jáne jolaýshylar kóligi basqarmasynyń basshysy Erjan Dıhanbaev biryńǵaı tarıf óziniń negizgi mindetin — turaq oryndarynyń aınalymyn qamtamasyz etip, ásirese qalanyń ortalyq bóliginde bos turaqtardyń bolýyn — oryndaýdan qalǵanyn atap ótti. Onyń aıtýynsha, sonyń saldarynan júrgizýshiler bos oryn izdeýge kóbirek ýaqyt jumsaýǵa májbúr bolyp, bul saparlar sanynyń artýyna jáne jol jelisine qosymsha salmaq túsýine ákeledi.
Bul máseleni sheshý úshin turaq quny naqty aýmaqtyń kólik júktemesi men fýnksıonaldyq maqsatyna baılanysty bolatyn dıfferensıaldy tarıfteý júıesin engizý usynylyp otyr.
«Joba boıynsha kólik júktemesi salystyrmaly túrde tómen ýchaskeler úshin tarıf saǵatyna 100 teńge deńgeıinde saqtalady. Turaq keńistigin paıdalaný qarqyndylyǵy ortasha aýmaqtar úshin saǵatyna 150 teńge bolady. Al turaq oryndary tapshy, qozǵalysy qarqyndy aımaqtar úshin saǵatyna 200 teńge», — dep habarlady vedomstvo.
Sonymen qatar turǵyndar úshin qoldanystaǵy jeńildikter saqtalady. Ákimdik eske salǵandaı, buryn Almatyda jol qozǵalysyn uıymdastyrý qaǵıdalary (jol qozǵalysy qaǵıdalarymen rettelmegen bóliginde) bekitilgen. Oǵan sáıkes aqyly turaqtar aımaǵynda turatyn turǵyn úı ıeleri arnaıy ruqsat rásimdep, óz turǵylyqty jerine jaqyn tańdaǵan turaqta tegin paıdalana alady. Sondaı-aq paıdalanýshylardyń birqatar sanaty úshin jeńildikter qoldanylady. Bul shara jergilikti turǵyndardyń múddesin eskerip, olarǵa turaq keńistigin paıdalanýdyń qolaıly jaǵdaıyn jasaıdy.
Jobany ázirleýshilerdiń pikirinshe, usynylyp otyrǵan ózgerister turaq keńistigin tıimdirek basqarýǵa baǵyttalǵan.
Jobany iske asyrý ekinshi qatarǵa turaq qoıý jaǵdaılaryn azaıtyp, bos oryn izdeý ýaqytyn qysqartyp, qalanyń ortalyq bóligine túsetin kólik salmaǵyn azaıtyp, barlyq jol qozǵalysyna qatysýshylar úshin qolaıly jaǵdaı jasaıdy dep kútilýde.