Almaty turǵyndary aryqtardyń jabylýyna taǵy da narazylyq bildirýde. Bul joly sebep — Jandosov pen Gagarın kósheleriniń qıylysyndaǵy jóndelgen trotýar. Onda nóser sýyn qabyldaıtyn torlar tabıǵı eńisten joǵary ornatylǵan, bul jańbyr kezinde sý basýyna ákelýi múmkin, dep habarlaıdy infohub.kz saıty.
Jarıalanǵan vıdeoda er adam ashyq aryqtyń ornyna qoıylǵan torlar trotýar deńgeıinen joǵary bolsa, olar nóser sýyn ótkize ala ma degen suraq qoıady. Jańbyr kezinde sýdyń bir bóligi velojolǵa, odan ári jol jıegine shyǵýy ábden múmkin.
Pikirlerde qoldanýshylar taǵy da Almaty — kólbeý qala, munda sý únemi aǵyzylyp turýy kerek ekenin eske salady. Sonymen qatar, nóser kárizi únemi bitelip qalady, biraq ashyq aryqty tazalaý úshin kúrek ustaǵan bir adam jetkilikti, al jabyq aryq úshin tehnıka, sorǵylar, birneshe adam jáne aıtarlyqtaı qarjy qajet.
Eske salaıyq, shilde aıynyń basynda qoǵam belsendisi Tatána Begaıkına aryqtardy beton plıtalarmen jabýǵa moratorı engizýdi talap etip, petısıa bastaǵan edi. Almaty qoǵamdyq keńistikterdi damytý basqarmasy (QKDB) Kursiv LifeStyle-ke bergen jaýabynda qyzmetkerler petısıaǵa qol qoıǵan belsendilermen kezdeskenin aıtty.
«Turǵyndardyń usynystaryn qaraý jáne tehnıkalyq múmkindikterdi baǵalaý nátıjesinde aryq jelisiniń jekelegen ýchaskeleri boıynsha balama jobalyq sheshimder qabyldanýda», — delingen jaýapta.
Belsendi áıel shynymen de almatylyqtarmen kezdesýlerden keıin aryq jelisiniń bir bóligi ashylǵanyn aıtqan bolatyn. Biraq bizdiń basylymǵa qaı kóshelerde aryqtar ashylatyny týraly suraqqa basqarma jaýap bermedi.
Buǵan deıin Kursiv LifeStyle Almaty ákimdiginiń aryqtardy jabý sebepterin túsindirgenin jazǵan edi.