Besinshi qazan Qazaqstannyń eki iri qalasynda aýa sapasynyń nasharlaýymen este qalýy múmkin. Almaty men Atyraýdaǵy qolaısyz meteorologıalyq jaǵdaılar týraly «Qazgıdromet» eskertti, dep habarlaıdy infohub.kz saıty.
Sınoptıkter naqtylaǵandaı, qolaısyz meteorologıalyq jaǵdaılar (QMJ) Almatyda, al túnde Atyraýda boljanady.
Mundaı jaǵdaılar tymyq aýa raıy, álsiz jel, tuman jáne temperatýralyq ınversıa qosylǵanda qalyptasady. Osyndaı aýa raıynda lastaýshy zattar atmosferanyń jerge jaqyn qabatynda jınaqtalyp, aýa sapasynyń nasharlaýyna ákelýi múmkin.
Osyndaı kezeńderde densaýlyqqa teris áser etý qaýpi artady, ásirese sozylmaly aýrýlary bar adamdar úshin. Lastaný deńgeıine jeldiń jyldamdyǵy, jaýyn-shashyn, ylǵaldylyq jáne aýa temperatýrasy da áser etedi.
Turǵyndarǵa kóshede, ásirese avtojoldar men basqa da lastaný kózderiniń janynda bolý ýaqytyn qysqartý usynylady. Balalar men júkti áıelderge uzaq serýendeýden bas tartý keńes etiledi.
Tynys alý jáne júrek-qan tamyrlary aýrýlarymen aýyratyn adamdarǵa, sondaı-aq alergıasy barlarǵa qajetti dárilerdi ózderimen birge alyp júrý usynylady. Ashyq aýadaǵy dene belsendiligin shektep, múmkindiginshe jattyǵýlardy jabyq úı-jaılarǵa kóshirgen jón.
Buǵan deıin «Kýrsıv» Qazaqstanda 6 qazanda turaqsyz aýa raıy saqtalatynyn jazǵan bolatyn. «Qazgıdromettiń» boljamynsha, eldiń basym bóliginde jańbyr men qar jaýady, soltústik-shyǵysta jáne ońtústik-shyǵysta qatty jaýyn-shashyn kútiledi. Bes oblysta túnde úsik soǵady.