Ótken jumada Almatyda tarıhı sát oryn aldy: at ústindegi kúres túrinen ótken Qasqyr Cup debúttik medıatýrnıriniń alańynda alǵash ret áıelder kúsh synasty, dep habarlaıdy infohub.kz saıty.
Aýdaryspaq jarysynda atqa Bopaı atymen tanymal jaýynger qyz Zamzagúl Faızollanova men Tomırıs dep atalatyn Gúlmaral Erkebaeva mindi. Aıta keteıik, ekeýi de kúsh qurylymdarynda — Qorǵanys mınıstrligi men İshki ister mınıstrliginde qyzmet etedi. Erkebaeva — İİM aǵa leıtenanty, al Faızollanova kapıtan sheninde jáne Qorǵanys mınıstrliginiń Ortalyq áskerı sport klýbynyń sport komıtetinde ókildik etedi.
Aýdaryspaq dástúrli túrde erler sporty jáne qatal sport túri sanalady. Buǵan deıin qyzdar qazaq kúresi men erkin kúreste de birneshe ret kezdesip, olardyń arasyndaǵy esep teń bolǵan.
Osy beldesýdiń jeńimpazy Erkebaeva atandy. Sońǵy sekýndtarda ol qarsylasyn attan julyp túsirdi.
«Buǵan deıin de atqa mingenimizben, er ústinde kúresý úshin rýh kerek eken. Bir jaǵynan, atty basqarý kerek, ekinshi jaǵynan, adammen kúresý kerek. Kúsh — qoldyń kúshinde emes, júrekte. Biz qazaq qyzdarynyń rýhy men minezin kórsettik», — dedi Erkebaeva.
Onyń aıtýynsha, qyzdar týrnırge jarys aldynda ǵana daıyndala bastaǵan.
Qasqyr Cup týrnıri 2 qazanda ótti. Ol aýdaryspaqty keń aýdıtorıaǵa nasıhattaý maqsatynda uıymdastyryldy. Jarqyn shoý otandyq blogerler men akterler qaýymynyń túsin jınady.
Týrnır jeńimpazy jáne Asar-Ume qorynyń basshysy Asqat Nurmashev is-shara barysynda Talǵardaǵy muqtaj kópbalaly otbasyna jańa úıdiń kiltin tabys etti.
Uıymdastyrýshylar jınalǵandarǵa ulttyq sportty qoldaǵany úshin alǵys aıtyp, Qasqyr Cup-ty jalǵastyrý josparlaryn málimdedi. Bolashaqta jarystar úlken stadıondarda ótýi múmkin.
Buǵan deıin Kursiv LifeStyle Almatyda blogerler, ártister men medıa tulǵalar qatysqan alǵashqy Qasqyr Cup aýdaryspaq týrnıri ótkenin jazǵan bolatyn. Jarystyń eń kútpegen sátteriniń biri Nıgerıalyq qatysýshy Muhammadtyń jeńisi boldy.