Алматыда Хэллоуин түні бірқатар көлік иесі үшін әкімшілік жазаға ұласты: 17 жүргізуші көліктерін ерекше әрі қорқынышты етіп безендіргені үшін жауапкершілікке тартылды, деп хабарлайды infohub.kz сайты.
КТК телеарнасының сайты хабарлағандай, шығармашыл көлік иелері шанақты, жүксалғыш пен бамперлерді қанды алақан іздерімен және адамның аяқ-қолының муляждарымен безендірген. Алайда телеарнаның дерегінше, олар безендіру мемлекеттік нөмір белгілері мен фараларды жаппауы керектігін ескермеген.
Сондай-ақ мұндай безендірулер басқа жол қозғалысына қатысушыларды қорқытып, алаңдатуы мүмкін екені атап өтілді. Нәтижесінде 17 жүргізуші жауапкершілікке тартылып, әрқайсысына 65 мың теңгеге дейін айыппұл салынды.
Бұған дейін Астанада балағат сөздер жазылған көліктің жүргізушісі 10 тәулікке қамауға алынғаны хабарланған болатын.
Сонымен қатар Алматы полициясы Хэллоуинде жаппай ұстаулар туралы ақпаратқа түсініктеме берді. Анықталғандай, қоғамдық тәртіп пен азаматтардың қауіпсіздігін қамтамасыз етуге бағытталған профилактикалық шаралар жүргізілген. «Арбат» жаяу жүргіншілер аймағында түнгі уақытта заңды өкілдерінің еріп жүруінсіз жүрген 28 жасөспірім анықталды.