Almaty kóshelerinde Mercedes kóliginiń júrgizýshisi jol júrý erejelerin ádeıi jáne óreskel buzǵan vıdeo áleýmettik jelilerde tarady, dep habarlaıdy infohub.kz.
Polısıa qyzmetkerleri ınternet-keńistikti monıtorıńteý barysynda buzýshynyń jeke basyn jedel anyqtady. Ol 19 jastaǵy jergilikti turǵyn bolyp shyqty. Tekserý barysynda jas jigittiń kólik júrgizý quqyǵy múldem joq ekeni anyqtaldy.
«Osy buzýshylyq úshin ol ákimshilik jaýapkershilikke tartyldy. Sonymen qatar, ádeıi minez-qulyq jáne qoǵamdyq tártipti buzǵany úshin júrgizýshi polısıaǵa jetkizilip, Almaty qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynyń sheshimimen usaq buzaqylyq úshin jaýapkershilikke tartyldy», — dep málimdedi polısıa.
Buzýshyǵa bes táýlikke ákimshilik qamaý jazasy taǵaıyndaldy. Mercedes kóligi evakýatormen aıyppul turaǵyna jetkizildi.