Almatyda «Jibek joly» stansıasynan áýejaıǵa deıingi metropolıtenniń ekinshi jelisiniń jobalaý-smetalyq qujattamasyn ázirleýge 150 mln teńge baǵyttaý josparlanyp otyr. Bul týraly qalalyq máslıhat otyrysynda Almaty qalasynyń ekonomıka jáne qarjy basqarmasynyń basshysy Baýyrjan Qudaıbergenov málimdedi, dep habarlaıdy infohub.kz saıty.
Onyń aıtýynsha, jyl sońyna deıin «Qalqaman» stansıasyn paıdalanýǵa berý josparlanǵan. Ony iske qosý jumystaryna 1,1 mlrd teńge bólinip otyr.
«Sonymen qatar bıyl «Qalqaman» stansıasynan «Barlyq» stansıasyna deıingi ýchaskeniń qurylysy bastaldy. Jobany júzege asyrýǵa jergilikti búdjetten 243,3 mln teńge qarastyrylǵan, taǵy 45 mlrd teńge Infraqurylymdy damytý qorynan bólindi. Metropolıten jelisin odan ári keńeıtý úshin «Jibek joly» stansıasynan áýejaıǵa deıingi ekinshi jeliniń jobalaý-smetalyq qujattamasyn ázirleýge 150 mln teńge qarastyrylǵan», — dedi basqarma basshysy.
Ol metrony damytýmen qatar radıaldy baǵyttardy, ishki kólik baılanystaryn jáne shaǵyn aýdandardyń jol jelisin damytý jumystary jalǵasyp jatqanyn atap ótti.
Máselen, Rysqulov dańǵylynyń qala shekarasyna deıingi qurylysyn aıaqtaýǵa 5 mlrd teńge baǵyttalady. Muqanov kóshesin Gogol kóshesinen Raıymbek dańǵylyna deıin uzartýǵa 500 mln teńge, al Raıymbek dańǵylyn Shyǵys aınalma avtomobıl jolyna (SHAAJ) deıin uzartýǵa 5 mlrd teńge bólinedi.
«Shaǵyn aýdandardyń jol ınfraqurylymy da damıtyn bolady. Jyl sońyna deıin Aqjar shaǵyn aýdanyndaǵy jol qurylysyn aıaqtaýǵa 2,7 mlrd teńge, Terekti shaǵyn aýdanyndaǵy jol jumystaryna 650 mln teńge baǵyttalady. Qoǵamdyq kóliktiń turaqty jumysyn qamtamasyz etý úshin qosymsha 12 mlrd teńge sýbsıdıalaýǵa bólinedi. Onyń 10 mlrd teńgesi avtobýs tasymalyna, 2 mlrd teńgesi metropolıten tasymalyna qarastyrylǵan», — dedi spıker.