Almaty oblysynda quqyq qorǵaý organdary tyıym salynǵan dinı-ekstremıstik «Hızb ýt-Tahrır» uıymynyń uıashyǵyn áshkereledi. Bul týraly infohub.kz saıty habarlaıdy.
NUR.KZ agenttigi oblystyq din isteri basqarmasyna silteme jasap habarlaǵandaı, aqparat vedomstvonyń Instagram-daǵy resmı paraqshasynda jarıalanǵan. Eńbekshiqazaq aýdanynyń Shelek aýylynda ýákiletti organdardyń úılestirýimen polısıa qyzmetkerleri Qazaqstan aýmaǵynda tyıym salynǵan «Hızb ýt-Tahrır» dinı-ekstremıstik uıymynyń qyzmetine qatysy bar dep kúdiktelgen adamdarǵa qatysty sharalar keshenin ótkizdi. Uıashyqqa 25 jergilikti turǵyn tartylǵan.
Kúdiktilerdiń turǵan jerlerinde sanksıalanǵan tintý jáne jeke tintý barysynda elektrondyq qurylǵylar men dinı mazmundaǵy materıaldar tabylyp, tárkilendi. Tárkilengender qatarynda: 11 smartfon, 93 kitap, 16 broshúra, 2 dápter, sondaı-aq dinı sıpattaǵy jazbalary bar bloknot.
Qazirgi tańda osy fakti boıynsha sotqa deıingi tergep-tekserý aıasynda qajetti tergeý jáne prosestik áreketter júrgizilýde. Bolǵan oqıǵanyń barlyq mán-jaıy anyqtalyp, tárkilengen ádebıet pen elektrondyq materıaldar zerdelenýde, sondaı-aq adamdardyń tyıym salynǵan uıym qyzmetine qatysý dárejesi belgilenýde. Ótkizilgen sharalardyń nátıjesi boıynsha kúdiktilerdiń áreketine tıisti quqyqtyq baǵa beriledi.