Almaty oblysyndaǵy eki aýyldyń turǵyndary jerdiń jeke menshikke berilýinen mal jaıylymnan jáne sýǵa qol jetkizýden aıyryldy. Bul týraly infohub.kz saıty habarlaıdy.
Astana TV telearnasynyń málimetinshe, jaǵdaı Uzynaǵash jáne Jańaqurylys aýyldarynda oryn alǵan. Turǵyndar kóp jyldar boıy Qarasý ózeniniń jaǵasynda mal jaıyp kelgen. Alaıda shamamen 10 jyl buryn jeke úıler salyna bastap, sýǵa barar jol qorshaýlarmen bógelgen. Endi turǵyndar maldy jaıylymǵa shyǵarý úshin birneshe shaqyrym jerge ketýge májbúr.
«Mal jaıý bylaı tursyn, ony sýǵa da apara almaımyz. 10 jyldan astam ýaqyt osynda 300-den astam mal jaıdym. Qazir 40-50 sıyrdy sýǵa apara almaı otyrmyz. Osy máselemen 10 jyldaı ábigerlenip júrmiz», — dedi Jańaqurylys aýylynyń turǵyny Jomart Apetaev.
Sý kodeksine sáıkes, sý qorǵaý beldeýiniń eń az eni 35 metrdi quraıdy. Alaıda qazir qorshaýlar ózenge tikeleı taqap tur. Turǵyndar bul másele boıynsha jyl saıyn ákimdikke júginetinin, biraq shara qoldanylmaı otyrǵanyn aıtady.
«Jer ýchaskeleri konkýrstyq negizde berilgende, daıyndyq jumystary júrgizilgende sý qorǵaý aımaǵynyń normalary, mal aıdaıtyn jolaqtar eskerilgen. Al qazir qorshap alý daýly másele týdyryp otyr. Bul — jer ıesiniń jaýapkershiligi. Iaǵnı ol normalardy eskermeı qorshap alǵan», — dedi Uzynaǵash aýyldyq okrýgi ákimdigi apparatynyń bas mamany Álıa Abýova.
Ákimdikte zańsyz qorshaýlardy joıý jumystary júrgizilip jatqanyn málimdedi. Eger ıelerimen kelisimge kelý múmkin bolmasa, bılik sý qorǵaý aımaǵyn bosatý úshin sotqa júginetin bolady.