Almaty aglomerasıasynda barlyǵy 5 100 oqýshy ornyna eseptelgen bes jańa mektep salý josparlanýda. Joba Almaty oblysy men Almaty qalasy ákimdikteriniń birlesken kúshimen júzege asyrylady. Bul oryn tapshylyǵyn joıýǵa jáne oqýshylardyń maıatnıktik kóshi-qonyn azaıtýǵa múmkindik beredi, dep habarlaıdy infohub.kz saıty.
Bul týraly Almaty oblysynyń ákimi Marat Sultanǵazıev «Konstıtýsıalyq qundylyqtar: kásibılik, sapa, nátıje» konferensıasynda málimdedi. Birlesken jobanyń aldyn ala quny shamamen 41,8 mlrd teńgeni quraıdy. Oblystyq ákimdik jer telimderin anyqtap, barlyq tehnıkalyq aqparatty Almaty qalasynyń jobalyq keńsesine tapsyrdy.
Bul bastamanyń basty maqsaty — balalarǵa úıine jaqyn jerde oqýǵa múmkindik berý. Qazirgi ýaqytta oblysta turatyn 16 myńǵa jýyq bala kún saıyn megapolıstegi mektepterge oqýǵa barýǵa májbúr.
Qurylys kelesi eldi mekenderde josparlanǵan: Alataý qalasy (Jańa Dáýir shaǵyn aýdany) — 900 oryndyq mektep; İle aýdany (Ekpindi aýyly) — 900 oryndyq mektep; Qarasaı aýdany (Kóksaı aýyly) — 1 200 oryndyq mektep; Qarasaı aýdany (Qyrǵaýyldy aýyly) — 1 200 oryndyq mektep; Talǵar aýdany (Tuzdybastaý aýyly) — 900 oryndyq mektep.
Sonymen qatar, 2026-2027 oqý jylyna qaraı óńirde 4 200 orynǵa eseptelgen «Keleshek mektepteri» baǵdarlamasy aıasynda bes jańa mektep paıdalanýǵa beriledi. Olar Qoıanqus (Alataý qalasy), Tilendıev (İle aýdany), Bulaqty (Qarasaı aýdany) aýyldarynda, sondaı-aq Sataı jáne Ashysaı (Eńbekshiqazaq aýdany) aýyldarynda ashylady. Bul nysandardyń iske qosylýy úsh mekteptegi úsh aýysymdy oqytý máselesin tolyq sheship, taǵy eki mekemedegi oryn tapshylyǵyn joıady. Budan basqa, renovasıa baǵdarlamasy aıasynda kúrdeli jóndeýden ótken taǵy 10 jańartylǵan mektep esigin ashady.
Jalpy, 2026-2027 oqý jylynda oblystyń 502 mektebinde 385 myńǵa jýyq bala bilim alady, onyń 35 myńnan astamy — birinshi synyp oqýshylary.
Óńir joǵary demografıalyq ósimdi kórsetip otyr. Ákimdiktiń derekterine sáıkes, sońǵy tórt jylda oblysta 75 jańa mektep pen alty qosymsha ǵımarat salyndy. Bul úsh aýysymdy mektepter sanyn 52-den 23-ke deıin qysqartýǵa jáne 5,8 myń oqýshyny tasymaldaý máselesin sheshýge múmkindik berdi.
2026-2030 jyldar aralyǵynda EPC+F mehanızmi boıynsha oblysta eń problemalyq núktelerde — Ótegen batyr, Jaınaq, Baıserke, A. Toqpanov jáne Báıterek aýyldarynda taǵy bes mektep (4 200 oryn) salynady. Bul 7 204 balanyń úsh aýysymdy oqý máselesin sheshýge jáne taǵy 2 871 oqýshyny tasymaldaý qajettiligin azaıtýǵa múmkindik beredi.