Almaty oblysynda jol-kólik oqıǵasy bolyp, eki kámeletke tolmaǵan bala zardap shekti. Kólik jol jıeginde otyrǵan balalardy qaǵyp, júrgizýshi oqıǵa ornynan qashyp ketken. Keıin kúdiktini anyqtap, ustaý múmkin boldy, dep habarlaıdy infohub.kz saıty.
Oqıǵa Telegram-daǵy Qumash arnasynda jarıalanǵan beınejazbaǵa túsken. Arnanyń málimetinshe, Abaı aýylynda Cobalt kóliginiń júrgizýshisi jol jıeginde turǵan eki balany qaǵyp ketken.
NUR.KZ tilshisine Almaty oblysy densaýlyq saqtaý basqarmasynyń baspasóz qyzmeti habarlaǵandaı, jaraqat alǵan eki kámeletke tolmaǵan bala Qarasaı klınıkalyq kópbeıindi ortalyq aýdandyq aýrýhanasyna jetkizilgen.
«Eki naýqasqa da ota jasalyp, otadan keıin anestezıologıa, reanımasıa jáne qarqyndy terapıa bóliminde boldy. Búgingi tańda bir naýqas ári qaraı emdelý úshin hırýrgıa bólimshesine aýystyryldy. Ekinshisi reanımasıada em qabyldaýdy jalǵastyrýda, onyń jaǵdaıy aýyr dep baǵalanýda», — dedi dárigerler.
Oblystyq polısıa departamentiniń baspasóz qyzmetiniń málimetinshe, kámeletke tolmaǵandardy qaǵý faktisi boıynsha qylmystyq is qozǵalǵan. Kúdikti anyqtalǵan.
«Qazirgi tańda JKO jasaǵan soń oqıǵa ornynan qashyp ketken 65 jastaǵy júrgizýshi ustaldy. Ol ýaqytsha ustaý ızolátoryna qamaldy», — dedi polısıada.
Qazirgi ýaqytta oblystyq polısıa departamenti oqıǵanyń barlyq mán-jaıyn tolyq, jan-jaqty jáne obektıvti anyqtaýǵa baǵyttalǵan qajetti tergeý áreketterin júrgizýde.
Nazar aýdaryńyz! 18+! Beınejazbada qatygezdik kórinisteri bar, ony kámeletke tolmaǵandarǵa, psıhıkasy turaqsyz adamdarǵa jáne júkti áıelderge qaraýǵa usynylmaıdy!