AI Talents Almaty білім жобасының 11 жеңімпазы Америка Құрама Штаттарына аттанып, халықаралық технологиялық алаңда Қазақстанды таныстырады, жасанды интеллект конференциясына қатысып, осы саладағы әлемдік әзірлемелермен танысады. Бұл туралы infohub.kz сайты хабарлайды.
AI Talents Almaty — оқушыларды бағдарламалау мен жасанды интеллектке баулитын білім жобасы. Бағдарлама Алматы цифрландыру басқармасының қолдауымен жүзеге асырылып, бұған дейін ақпараттық технологиялар саласында тәжірибесі болмаған балаларға да арналған.
Оқыту бағдарламалау негіздерінен басталып, біртіндеп қосымшалар, цифрлық сервистер мен AI-агенттер жасауға көшеді. Оқушылар заманауи құралдармен жұмыс істеп, процестерді автоматтандыруды және кәсіби тәлімгерлердің жетекшілігімен нақты міндеттерге шешім әзірлеуді үйренеді.
«Бағдарлама практикалық оқытуға негізделген: оқушылар бағдарламалау негіздерін меңгеріп, AI-құралдарын қолдануды, цифрлық өнімдер әзірлеуді және өз AI-агенттерін жасауды үйренеді. Қатысушыларға кәсіби тәлімгерлер мен IT-индустрия сарапшылары көмектеседі, ал алған білімдерін хакатондарда және өз жобаларын әзірлеу кезінде қолданады», — деді Алматы цифрландыру басқармасының басшысы Нұрқанат Сабит.
Жоба аясында алғашқы тестілеуден 10 мың оқушы өтіп, оның 1 500-і тереңдетілген оқытуға іріктелді. 1 мыңнан астам қатысушы курсты аяқтап, Junior-әзірлеуші сертификаттарын алып, өз цифрлық өнімдерін таныстырды.
Практикалық бағдарлама үш күндізгі хакатонды қамтыды, онда қатысушылар жобалар әзірлеп, оларды сарапшылар алдында қорғады. AITK Fest 2026 қорытындысы бойынша Кремний алқабына бару мүмкіндігін алған 11 жеңімпаз анықталды.
АҚШ-та оқушылар NVIDIA компаниясының аға техникалық бағдарлама менеджері Абхиджит Джошимен (Abhijeet Joshi) кездесіп үлгерді.
Сапардың басты оқиғаларының бірі — 3-6 қараша аралығында өтетін TechEquity AI Summit 2026 конференциясына қатысу. 5 қарашаға жасанды интеллектті дамытуға және оны түрлі салаларда қолдануға арналған конференцияға бару жоспарланған. Спикерлер қатарында NVIDIA, Google, Google DeepMind, Snowflake, Meta, IBM, Adobe және Стэнфорд университетінің сарапшылары бар.
Сонымен қатар алматылық оқушылар Company Brain Hackathon-ға қатысып, алған білімдерін қолданып, басқа әзірлеушілермен тәжірибе алмасады.
Сапар бағдарламасына Стэнфорд университеті мен Берклидегі Калифорния университетіне (UC Berkeley) бару, олардың зерттеу бағыттарымен және оқу мүмкіндіктерімен танысу да кірді.
Қатысушылар California PATH зерттеу бағдарламасының 40 жылдығына арналған PATH@40 халықаралық іс-шарасына да барады. Онда жасанды интеллект, ұшқышсыз көлік және интеллектуалды қалалық инфрақұрылым саласындағы әзірлемелер таныстырылады.
Сапар оқушыларға жетекші технологиялық компаниялар мен университеттердің жұмысымен танысуға, өз әзірлемелерін таныстыруға және халықаралық кәсіби іс-шараларға қатысу тәжірибесін алуға мүмкіндік береді.