Almaty polısıa departamentiniń resmı ókili Saltanat Ázirbek jańa erejeler kúshine engennen keıin 65 jastan asqan júrgizýshilerdi jıi toqtatatyny týraly túsinikteme berdi, dep habarlaıdy infohub.kz.
Eske salaıyq, 25 tamyzdan bastap Qazaqstan Respýblıkasynyń «Jol júrisi týraly» Zańyna ózgerister kúshine enedi. Túzetýlerge sáıkes, 65 jastan asqan júrgizýshiler, sondaı-aq múgedektigi bar júrgizýshiler eki jyl saıyn medısınalyq tekserýden ótýge mindetti.
Saltanat Ázirbek egde jastaǵy júrgizýshilerdi medtekserýden ótkenin tekserý úshin jıi toqtatatynyn túsindirdi. «Bul shekteý sharasy emes, bul bizdiń azamattarymyzǵa, úlken býynǵa degen qamqorlyq. Jasy ulǵaıǵan saıyn reaksıanyń nasharlaıtyny, kózdiń kórýiniń tómendeıtini belgili. Sondyqtan osy jańa erejege sáıkes eki jylda bir ret medısınalyq komısıadan ótý mańyzdy. Kádimgi josparly medısınalyq komısıadan. Bul úlken býynnyń qatysýymen bolatyn jol-kólik oqıǵalarynyń aldyn alý», — dedi polısıa departamentiniń ókili.
Saltanat Ázirbektiń aıtýynsha, joldaǵy tekserýler patrúldik ekıpajdar qyzmet atqarý barysynda jumys tártibimen júrgiziledi. 65 jastan asqan júrgizýshilerdi arnaıy toqtatý bolmaıdy. Sonymen qatar polısıa 65 jastaǵy jáne odan úlken azamattardyń medısınalyq tekserýden ýaqytyly ótýi qajet ekenin atap ótti.