Almatynyń Bostandyq aýdanyndaǵy turǵyn úı kesheniniń aýlasynda túnde pırotehnıka atyp, jergilikti turǵyn ákimshilik qamaýǵa alyndy: sot oǵan jeti táýlik jaza taǵaıyndady. Bul týraly infohub.kz saıty habarlaıdy.
NUR.KZ-tiń megapolıs polısıa departamentine silteme jasap habarlaýynsha, úı turǵyndary shýǵa shaǵymdanǵan. Habarlama tún ortasynda túsip, oqıǵa ornyna patrúldik polısıa kelgen.
«Pırotehnıka atqan er adamdy anyqtap, ustadyq. Oǵan qatysty úsh quqyqbuzýshylyq quramy boıynsha, sonyń ishinde usaq buzaqylyq úshin ákimshilik materıaldar toltyryldy. Sot sheshimimen er adam jeti táýlikke ákimshilik qamaýǵa alyndy», — delingen polısıa habarlamasynda.
Polısıa departamenti turǵyndarǵa belsendi azamattyq ustanymy men ýaqtyly belgi bergeni úshin alǵys aıtty.
«Dál osyndaı ótinishterdiń arqasynda quqyqbuzýshylyqtardy jedel toqtatýǵa múmkindik týyp otyr. Tún — tynyshtyq ýaqyty. Pırotehnıka búkil úıdiń mazasyn almaýy tıis. Aınalańyzdaǵylardy syılap, zańdy saqtańyzdar», — dep qosty DP-da.
Buǵan deıin Astanada birneshe azamat pırotehnıka atqany úshin jaýapkershilikke tartylǵany, onyń ishinde ekeýi qamaýǵa alynǵany habarlanǵan bolatyn.