Almaty taýlarynda 73 jastaǵy Ońtústik Koreıa azamaty Cho Kýkhıdi izdeý jumystary bir aptadan beri jalǵasyp jatyr. Ol jaıaý serýenge shyǵyp, baılanysqa shyqpaı qalǵan, dep habarlaıdy infohub.kz saıty.
Sheteldik azamat taýǵa dostarymen birge barǵan. Belgili bir sátte ol toptan oqshaýlanyp, keıin qońyraýlarǵa jaýap bermeı qoıǵan. Qutqarýshylar Kishi Almaty aınalma joly men Talǵar asýyn tekserip shyqty — ol sońǵy ret sonda kóringen. Dostarynyń aıtýynsha, Cho Kýkhı sol jerden shyńǵa jalǵyz kóterilmek bolǵan. Bir táýlik ótken soń týrısiń joǵalǵany týraly Ońtústik Koreıa elshiligine habarlanǵan.
İzdeý operasıasyna segiz tehnıka, jeti dron, tikushaq jáne qyzmettik ıtter jumyldyryldy.
Oqıǵaǵa baılanysty qutqarýshylar týrıserdi taýǵa jalǵyz shyqpaýǵa jáne marshrýttary týraly tanystaryna mindetti túrde aıtýǵa shaqyrdy.
«Eń basty ereje — qaı jerde bolsańyz da, túski saǵat birge deıin keri burylyp, qaıtý kerek. Taýda tez qarańǵy túsedi. Sáıkesinshe, siz jaryq ýaqyttaǵydaı taýly jerde baǵdar ustaı almaısyz. Ekinshiden, qara emes, ashyq tústi kıim kıińiz. Sebebi izdeý jumystary kezinde qara kıimdi adamdy, ásirese túnde tabý múmkin emes», — dedi «Erikti qutqarý qyzmetiniń» jetekshisi Qarlyǵash Núsirbekova.
Buǵan deıin 28 qyrkúıekte 73 jastaǵy sheteldik azamat top quramynda «Shymbulaq» aspaly jolymen kóterilip, sodan keıin óz betinshe jolyn jalǵastyryp, joǵalyp ketkeni habarlanǵan. İzdeý jumystary uıymdastyryldy. Kúni buryn TJM Qazaqstan Respýblıkasy azamatyn izdeý aıasynda qutqarýshylar Almaty mańyndaǵy taýly jerdi tekserýdi jalǵastyryp jatqanyn málimdegen.