Almatynyń Almaly aýdanynda qala nysandaryna boıaýmen jazý jazǵan eki er adam ustalyp, sot olardyń árqaısysyna bes táýlik ákimshilik qamaý jazasyn taǵaıyndady, dep habarlaıdy infohub.kz saıty.
NUR.KZ-tiń megapolıs polısıa departamentine silteme jasap habarlaýynsha, Almaly aýdanynda polısıa qala múlkin búldirýdiń eki deregin toqtatty. Eki oqıǵa da bir mezgilde derlik bolǵan.
Birinshi buzýshyny ýchaskelik ınspektor Jibek joly kóshesinde ustady. «Almatylyq Malsev Dmıtrı Vladımırovıch patrúldeý kezinde dýalǵa boıaýmen jazý jazyp jatqan jerinde ustaldy. Dál sol ýaqytta Brýsılovskı kóshesinde taǵy bir derek tirkeldi. 39 jastaǵy Ábdiramanov Jappar Ǵaıbýllaevıch dúken qabyrǵasyna boıaýmen jazý jazyp jatqan. Onyń áreketin de polısıa qyzmetkerleri toqtatty. Eki er adamǵa qatysty qoǵamdyq oryndardaǵy ǵımarattardy, qurylystardy jáne ózge de nysandardy lastaý faktisi boıynsha ákimshilik hattamalar toltyryldy», — delingen habarlamada.
Polısıanyń málimetinshe, materıaldar sotqa jiberildi. Eki buzýshy da kináli dep tanyldy. Árqaısysyna bes táýlik ákimshilik qamaý jazasy taǵaıyndaldy.
«Polısıa vandalızm derekterin anyqtaý jáne toqtatý jumysyn jalǵastyrýda. Bótenniń múlkine jazý jazý — beıkúná qyńyrlyq emes, jaýapkershilik kózdelgen ákimshilik quqyqbuzýshylyq», — dep qosty polısıa departamenti.