InfoHub Logo

Kórshimiz kóńildi adamdar bolatyn. Olardyń kóńilsiz júretin kezin az kóretinbiz. Búgin kútpegen jerden bulardyń úıine kóńilsizdik týa qaldy. Áıeli kúıeýine, kúıeýi áıeline qatty-qatty sóz aıtyp jatty. Áńgime, surastyra kelgenimizde, bir sabaq jipten bastaldy.

— Oıpyr - aý, bir sabaq jip tabylmaǵan ne sumdyq? Salaqsyń, olaqsyń! — deıdi kúıeýi.

— Dúkende joq bolsa, men qaıtemin? — deıdi kelinshegi.

— Jip bolmaýshy ma edi? — deıdi kúıeýi.

— Joq! — deıdi áıeli.

— Múmkin emes! — dep óńeshteıdi kúıeýi. Sonymen kóılek túımesin qadaıtyn aq jip tabylmaǵandyqtan kórshimiz ben ekeýmiz magazın aralaýǵa ózimiz shyqtyq. Meniń izdegenim de "usaq-túıektiń" bireýi, qaýipsiz ustaranyń pyshaǵy. Bul "pyshaqtyń" da áńgimesi az bolmap edi. "Tappaı keldik" degende: "Umytshaqsyń, erinsheksiń" dep, men de úıdiń ishin renjitkenim bar.

Kórshimiz ben ekeýmiz kózimizben kórgenshe, úı-ishimizdiń aıtqanyna sengenimiz joq. "Múmkin emes" deýmen júrip kesheler boıyndaǵy bar magazındi qarap shyqtyq. İzdegenimiz "bolymsyz" nárse, biraq kerekti zat. Jipsiz úı tirshiligi bitpeıtin sekildi. Túımeń úzilip elbe-delbe bolyp júrý — mádenıetsizdiktiń belgisi. Onyń ústine eki shalǵaıyńdy qashanǵy ustap júrersiń...

Endi bizdiń kirmegenimiz sharýashylyq eseptegi N2 magazın bolyp qaldy. Bul eń kórnekti magazınniń biri, soǵan jetkenshe asyqtyq. Bizdi satýshy áıel jaıdary qarsy aldy.

— Qosh keldińizder, ne tileısizder, qyzmetińizge biz daıyn! — dep aq jarqyndyǵyn kórsetti. Magazınniń "usaq-túıek" bakal satatyn áınekti jáshiginen árkim óz keregin taýyp alyp, kórip jatyr.

— Bizge jip kerek edi, — dedi kórshim.

— Maǵan ustaranyń pyshaǵy, — dedim men. Satýshynyń ekeýmizge kezek-kezek jypylyqtaı qaraǵan kózinen qysylyp turǵanyn bile qoıdyq. Bolmashy nárseni "joq" dep aıta almaı qulaǵyna deıin qyzardy. Jańa ǵana: "Kerektiń bári tabylady" dep turǵan jeńgeıdiń jaıdary sózi kómeskilenip qaldy.

— Erteń, bir kún bolyp qalar, qazir joq edi, — dedi kúbirlep.

— Endi qaıda bolady? — dedi kórshim.

— Temir jol boıyndaǵy magazınderden tabylmasa... — dedi de betin basqalarǵa burdy.

— Eń bolmasa qara jip bolsa da? — dedi kórshim qattyraq jekip.

— Aǵy bolmaǵanda qarasy bolatyn ba edi? — dedi satýshy áıel ashýlanyp.

Eki kórshi tura qalyp, endigi baratyn jerdi oılastyq. "Birimiz osy magazınniń dırektory Sáıdirge barsaq qaıtedi" dedik, birimiz temir jol boıyna tartýǵa usynys jasadyq. Biraq dırektordy da tappadyq, temir jol boıyndaǵy magazınge de jete almadyq. Óıtkeni, aspan aınalǵan ystyqta qalanyń bar magazınin aralap shyǵý, onyń ústine bir katok jip pen qańyltyr pyshaq tappaý — bizdiń júıke tamyrymyzdy qattyraq soqtyryp, sharshatyp ta tastap edi.

Biz endi úı ishimizdegi bolǵan kóńilsizdiktiń bas aıypkeri ózimiz bolyp kelemiz. Olarǵa biz "salaqsyń, olaqsyń, erinsheksiń" dep renjitip shyqqanda, tappaımyz dep oılamap edik.

— Endi qaıttik? — deıdi kórshim.

— Endi qaıttik? — dep men oǵan qaraımyn.

— Siz osyǵan bir aýyz óleń shyǵaryńyz, — dep kórshim jatty da jalyndy.

— Óleń, jip pen pyshaq bola ma? — dep edim oǵan kónbedi.

— Bardy jetkizip bermegen saýda basshylaryna sabaq bolsyn, ári kópshilikke mazaq bolsyn! — dedi qatýlanyp. Men oǵan kóne qoıdym da eki aýyz óleńdi qaladaǵy bas magazınniń dırektory Sáıdirdiń adresine jiberýdi uıǵaryp edim, kórshim oǵan da kónbedi.

Ine men jip kóptiń keregi. Sondyqtan da muny "maıda-shúıde" demeıik, kóptiń muqtajyn oılamaǵan saýda qyzmetkerlerin gazet arqyly: "salaqsyń, olaqsyń, erinsheksiń" dep uıaltqanymyz qolaıly bolar dep turyp aldy. Onyń usynysyna kónýge týra keldi. Sóıtip, áńgime bir sabaq jipten shyǵyp ketti de, aıaǵy feletonǵa ulasty. Óleńi mynadaı bolyp jazylyp edi:

Bul oqıǵa, Sáıdir - aý, Bir sabaq jipten bastaldy. Bir sabaq jip tabylmaı, Túımeniń orny bos qaldy... Jip tappaǵan ne sumdyq Qańyltyr, juqa pyshaqpen? Aınalysady endi kim, Osyndaı kerekti "usaq pen ?!."

---