Japonıada ótip jatqan Azıa oıyndarynda alǵashqy medaldar sarapqa salyndy. Qazaqstan qorjynyna tuńǵysh júldeni trıatlonshy Arlan Janabaı saldy — ol qola medal jeńip aldy, dep habarlaıdy infohub.kz saıty.
Otandasymyz qashyqtyqty 53 mınýt 11 sekýndta baǵyndyrdy: 750 metr júzý, 20 shaqyrym velosıped tebý jáne 5 shaqyrym júgirý. Japonıalyq chempıon Takýmı Hodjo 52.56 nátıjesimen márege birinshi jetti, Janabaı odan nebári 15 sekýndqa qalyp qoıdy. Kúmis Qytaı sportshysy Chjan Sújúıge buıyrdy — onyń ýaqyty 53.05.
Janabaıdyń Qazaqstan quramasyndaǵy áriptesi Aıan Beısenbaev 54.56 nátıjesimen toǵyzynshy oryndy ıelendi. Trıatlon qashyqtyǵyna 33 sportshy shyǵyp, márege 29-y jetti.
Azıada tarıhynda Qazaqstan trıatlonnan alty medal jeńip alǵan. Jalǵyz altyndy 2006 jyly Dohada ótken Azıa oıyndarynda Dmıtrı Gaag ıelengen. Beısenbaev 2018 jyly kúmis júldeger atansa, Azıada-2022-de úshinshi orynǵa turaqtady.
Japonıadaǵy XX Jazǵy Azıa oıyndary keshe, 19 qyrkúıekte, resmı túrde ashyldy. 45 eldiń sportshylary qatysatyn bul dodada 460 medal jıyntyǵy sarapqa salynady: 217-si erler arasynda, 204-i áıelder arasynda jáne 39-y aralas razrádtarda. Jarystar 41 sport túriniń 68 dısıplınasynda ótedi. Azıada-2026-da Qazaqstan quramasynyń namysyn 559 sportshy qorǵaıdy.