Astanada Qazaqstan ulttyq quramasy fýtbolshylarynyń avtograf-sessıasy kepteliske ulasty: jankúıerler bylyq shyǵardy, sportshylardy qaýipsizdik úshin sharadan alyp ketýge týra keldi, dep habarlaıdy infohub.kz saıty.
Threads áleýmettik jelisindegi yerlan_absatov degen paıdalanýshynyń aıtýynsha, oqıǵa elordadaǵy saýda-oıyn-saýyq ortalyqtarynyń birinde bolǵan. Onyń sózinshe, uly Ámirlan birneshe kún boıy súıikti oıynshysy Temirlan Anarbekovpen kezdesýdi kútken, alaıda sharany uıymdastyrý múldem sátsiz aıaqtalǵan.
«Bylyq bastaldy, tynys alý múmkin bolmady, balalar jylady. Sońynda fýtbolshylardy esi shyqqan toptan qorǵaý úshin alyp ketti. Biz bul sheshimdi tolyq túsinemiz, biraq ulym qazir qatty kúızelip otyr. Uıymdastyrýshylar bolǵan jaǵdaıǵa nazar aýdarsa eken», — dedi ol.
Qazaqstan fýtbol federasıasy Astanada ulttyq qurama oıynshylarymen avtograf-sessıany merziminen buryn aıaqtaýǵa týra kelgenin rastady.
«Ókinishke qaraı, bári avtograf ala almady. Balalardyń qaýipsizdigin qamtamasyz etý úshin sharany erterek aıaqtaýǵa týra keldi. Eger balańyz avtograf ala almasa, 19 qyrkúıekke deıin saǵat 19:00-ge deıin marketing@kff.kz mekenjaıyna ótinim berińiz. Balanyń aty-jóni men ata-anasynyń baılanys nómirin kórsetińiz. Biz arnaıy qol qoıylǵan ashyq hat daıyndaımyz. Bul sońǵy kezdesý emes! Kelesi avtograf-sessıa ótedi», — delingen Federasıa habarlamasynda.