Astana ákimdigi qoǵamdyq kólikte júrý tarıfin 150 teńge etip bekitýdi usynyp otyr. Ony 1 jeltoqsannan bastap engizý josparlanýda, dep habarlaıdy infohub.kz saıty.
Ákimdiktiń málimetinshe, Astanada qoǵamdyq kólikte júrý tarıfi 90 teńge bolyp 2014 jyly belgilengen. Sodan bergi 12 jylda júrý quny bir-aq ret qaıta qaralyp, qazirgi tańda 110 teńgeni quraıdy.
Aıta ketý kerek, 2014 jyldan beri tasymaldaýshylardyń negizgi shyǵyndary aıtarlyqtaı ósken: otyn, qosalqy bólshekter men jańa avtobýstardyń quny, sondaı-aq júrgizýshilerdiń eńbekaqysy. Máselen, 2014 jyly dızel otynynyń lıtri shamamen 107 teńge bolsa, qazir ol 329 teńgege jetken. Esepteýlerge sáıkes, osy kezeńde dızel otynynyń quny 3 eseden astam ósken.
Sonymen qatar, vedomstvonyń atap ótýinshe, júrgizýshilerdiń eńbekaqysy da edáýir ósken. 2014 jyly júrgizýshilerdiń jalaqysy orta eseppen 100–150 myń teńge shamasynda bolsa, qazir avtobýs synyby men jumys rejımine qaraı 700 myń teńgeden bastalady.
Osy kezeńde qosalqy bólshekter, avtomobıl shınalary, akýmýlátor batareıalary, avtobýstarǵa tehnıkalyq qyzmet kórsetý jáne jóndeý, sondaı-aq jańa jyljymaly quram satyp alý quny aıtarlyqtaı qymbattaǵan.
«Paıdalaný shyǵyndarynyń aıtarlyqtaı ósýine qaramastan, elordada qoǵamdyq kólikti júıeli jańartý jáne damytý jalǵasýda. Sońǵy úsh jylda tasymaldaýshylar qaýipsizdik, jaılylyq jáne ekologıalyq standarttarǵa saı keletin 1127 birlik jańa jyljymaly quram satyp aldy. Buǵan qosa, Astanada halyqty áleýmettik qoldaýdyń qoldanystaǵy sharalary saqtalýda. Astana qalasy máslıhatynyń 2018 jylǵy 29 naýryzdaǵy № 244/30-VI sheshimine sáıkes, jekelegen sanattaǵy azamattarǵa qalalyq jolaýshylar kóliginde júrý aqysynan bosatý túrindegi áleýmettik kómek kórsetiledi», — delingen habarlamada.
Tegin júrý quqyǵy myna sanattaǵy azamattarǵa beriledi: Uly Otan soǵysynyń qatysýshylary men múgedekteri jáne olarǵa teńestirilgen adamdar; jasy jáne eńbek ótili boıynsha zeınetkerler, sondaı-aq zeınetkerlik jasqa tolǵan jasy boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqy alýshylar; kópbalaly analar; kópbalaly otbasylar; múgedekter; on segiz jasqa deıingi múgedek balalar, onyń ishinde ata-analarynyń biri (zańdy ókilderi); Qazaqstandaǵy 1986 jylǵy 17–18 jeltoqsan oqıǵalaryna qatysýshylar qatarynan saıası qýǵyn-súrgin qurbandary, «Jappaı saıası qýǵyn-súrgin qurbandaryn aqtaý týraly» Qazaqstan Respýblıkasynyń Zańynda belgilengen tártippen aqtalǵandar.
Budan bólek, 2020 jyldyń naýryzynan bastap Astanada oqıtyn 18 jasqa deıingi balalarǵa tegin júrý qoldanylady.
«Sonymen qatar, avtomobıl kóligimen jolaýshylar men bagajdy tasymaldaý tarıfterin esepteý ádistemesine sáıkes júrgizilgen esepteýler boıynsha, 2026 jyly bir júristiń ortasha eseptik quny qoldanystaǵy júrý qunynan aıtarlyqtaı asyp túsedi. Paıdalaný shyǵyndarynyń ósýine, qoǵamdyq kóliktiń turaqty jumysyn qamtamasyz etý, avtobýs parkin odan ári jańartý jáne baǵyttar jelisin damytý qajettiligine baılanysty 1 jeltoqsannan bastap qolma-qol emes tólem kezinde júrý qunyn 150 teńge mólsherinde belgileý usynylady», — dedi ákimdikte.