Астананың кейбір тұрғындарына жақын күндері мүгедектігі бар адамдар күніне орай біржолғы әлеуметтік көмек тағайындалады: төлем мөлшері 21 625-тен 86 500 теңгеге дейін болады, деп хабарлайды infohub.kz сайты.
Астана әкімдігінің нақтылауынша, төлем алуға қалада тіркелген мүгедектігі бар адамдар құқылы. Мүгедектігі бар адамдар күні қазанның екінші жексенбісінде атап өтіледі — биыл ол 11-іне түсіп отыр.
Біржолғы көмектің мөлшері мүгедектік тобына байланысты. Бірінші топ үшін ол 20 айлық есептік көрсеткішті, яғни 86 500 теңгені құрайды. Екінші топтағы адамдарға, сондай-ақ 18 жасқа дейінгі барлық топтағы мүгедектігі бар балаларға 10 АЕК — 43 250 теңге қарастырылған. Үшінші топ 5 АЕК — 21 625 теңге алады.
Көмек алу үшін өтініш берудің қажеті жоқ: төлемдер «Азаматтарға арналған үкімет» мемлекеттік корпорациясының деректері негізінде автоматты түрде тағайындалады.
Әкімдік маңызды бір жайтқа назар аударды: егер адам жақында тұрғылықты жерін ауыстырса, жәрдемақы алушының мүгедектігі бойынша ісі Астанадағы жаңа тұрғылықты жеріне ауыстырылғанын тексеру қажет.
«Ережеге сәйкес, біржолғы әлеуметтік көмек күнтізбелік жылы бір рет қана бір негіз бойынша тағайындалады», — деп қосты әкімдікте.
Осылайша, егер азамат күнтізбелік жыл ішінде бұған дейін осындай әлеуметтік көмекті басқа негіз бойынша алған болса, оған мүгедектігі бар адамдар күніне қайта төлем жасалмайды.