Astanada respýblıkalyq «Quqyqtyq tártip» jedel-aldyn alý is-sharasy bastaldy. Osyǵan baılanysty polısıa kúsheıtilgen qyzmet rejımine kóshti. Bul týraly infohub.kz saıty elordalyq polısıa departamentine silteme jasap habarlaıdy.
İs-shara qoǵamdyq tártipti saqtaý, quqyq buzýshylyqtardyń aldyn alý men jolyn kesý, sondaı-aq azamattardyń qaýipsizdigin qamtamasyz etýge baǵyttalǵan. Polısıa departamentiniń habarlaýynsha, tártip saqshylary kóshelerde jáne basqa da qoǵamdyq oryndarda quqyqtyq tártipti qamtamasyz etý sharalaryn kúsheıtti. Qylmystar men ákimshilik quqyq buzýshylyqtardyń aldyn alýǵa, oqys oqıǵalarǵa jedel den qoıýǵa erekshe nazar aýdarylýda.
OİSh aıasynda patrúldeý kezinde polısıa qyzmetkerleri 28 jastaǵy júrgizýshi basqarǵan Haval kóligin tekserý úshin toqtatty. Onyń buǵan deıin kólik quralyn basqarý quqyǵynan aıyrylǵany anyqtaldy. Polısıa departamentinde naqtylaǵandaı, buzýshy jaýapkershilikke tartyldy, kólik komýnaldyq turaqqa qoıyldy, al materıaldar sheshim qabyldaý úshin sotqa jiberildi.
Astana polısıasy qala turǵyndary men qonaqtaryn belgilengen erejelerdi saqtaýǵa, aınalasyndaǵylardy qurmetteýge, qaýip tóngen jaǵdaıda nemese oqıǵa oryn alǵanda dereý polısıa qyzmetkerlerine júginýge shaqyrady.
Eske salaıyq, buǵan deıin Almatyda da polısıa jumysy kúsheıtilgeni habarlanǵan bolatyn: patrúldeý kóshelerdi, aýlalardy jáne halyq kóp jınalatyn oryndardy qamtıdy. Bul — osyǵan uqsas jedel-aldyn alý is-sharasy aıasynda júzege asyrylýda.