Elordalyq «Astana» fýtbol klýby oıynshylar aldyndaǵy qaryzynyń baryn resmı rastap, komanda maýsymdy sońyna deıin jetkizetinin málimdedi, dep habarlaıdy infohub.kz saıty.
Klýb qoǵamda taraǵan qarjylyq problemalar týraly aqparatqa jaýap berdi. Buǵan deıin ınsaıder Eldar Amanbaev keıbir fýtbolshylar úsh aılyq jalaqy qaryzy ótelmeıinshe alańǵa shyǵýdan bas tartyp jatqanyn, jalpy somasy 700 mıllıon teńgeni quraıtynyn habarlaǵan edi.
Klýbtyń Instagram-paraqshasynda jarıalanǵan resmı málimdemede: «"Astana" FK negizgi quramdaǵy birqatar fýtbolshylar aldyndaǵy jekelegen kelisimsharttyq mindettemeler boıynsha beresheginiń baryn rastaıdy, osyǵan baılanysty ujymdyq ótinish tústi. Klýb basshylyǵy fýtbolshylardyń ustanymyn túsinistikpen qabyldaıdy. Qalyptasqan qarjylyq qıyndyqtarǵa qaramastan, fýtbolshylar men bapkerlik shtab uzaq ýaqyt boıy kásibı mindetterin tolyq kólemde oryndap, jattyǵý prosesine jáne resmı machtarǵa qatysyp, alańda "Astana" FK men Qazaqstan astanasynyń abyroıyn laıyqty qorǵady», — delingen.
Klýb oıynshylardyń jankúıerlerge, klýbqa jáne onyń sporttyq maqsattaryna adaldyǵyna kúmándanbaıtynyn atap ótip, alyp-qashpa áńgimeler men asyǵys qorytyndylardan aýlaq bolýǵa shaqyrdy. «Klýb komanda aldyndaǵy kelisimsharttyq mindettemelerin oryndaý úshin qajetti sharalardy qabyldaýda. Jaǵdaı qalaı damyǵanyna qaramastan, "Astana" FK el chempıonatynda óner kórsetýdi jalǵastyryp, maýsymdy sońyna deıin jetkizedi. Klýb óz jumysyn ádettegi rejımde jalǵastyrady», — dep atap ótilgen habarlamada.
«Astanada» sondaı-aq árbir fýtbolshy men qyzmetkerdiń, onyń ishinde otbasy aldyndaǵy mindettemelerin túsinetinderin jáne qaryz máselesin sheshýdi klýb quryltaıshysymen birge basym mindetterdiń biri dep sanaıtyndaryn jetkizdi. Komandanyń Qazaqstan premer-lıgasynda óner kórsetýin toqtatý máselesi qarastyrylǵan joq. «Qajet bolǵan jaǵdaıda negizgi quramǵa rezervtegi oıynshylardy, jastar komandasynyń múshelerin nemese óner kórsetýge quqyǵy bar basqa da fýtbolshylardy tartý múmkindigi qarastyrylǵan. Klýb kúntizbege sáıkes barlyq machtarǵa qatysýdy qamtamasyz etedi», — dep túıindedi klýb ókilderi.
QPL-diń aǵymdaǵy maýsymynda Qazaqstannyń jeti dúrkin chempıony 23 machtan keıin 45 upaı jınap, úshinshi orynda tur. Joǵaryda shymkenttik «Ordabasy» (55 upaı) jáne almatylyq «Qaırat» (54 upaı) ornalasqan.