Астанада Сарайшық ауданындағы тұрғын үй кешенінің жанындағы ашық тұрақта бес жеңіл көлік өртенді. Өрт салдарынан ер адам ауыр жарақат алды — ол жанып кеткен екі көліктің иесі, деп хабарлайды infohub.kz сайты.
Зардап шеккен адам III дәрежелі күйікпен жансақтау бөлімінде жатыр. Дәрігерлер оның жағдайын ауыр деп бағалап отыр.
«Аяғы, беті, іші — қысқасы, ол да күйіп қалды. Әрең алып шықтық. Ол мына көлікті алып кетпек болды, құтқармақ болды. Шыққан кезде осында бір көлік тұрған, асығыс соғылып кетті, меніңше. Көрмеді, түтін қою еді», — деді куәгерлер.
Полицияның болжамынша, көліктің бірінде қозғалтқышты қашықтан іске қосу кезінде электр сымдары тұйықталған. Куәгерлердің айтуынша, өрт шыққан көлік тіпті орнынан қозғалып, алдында тұрған Elantra-мен соқтығысқан. Hyundai шамамен жартылай күйіп кеткен. Қалған көліктерден тек күйген темір қаңқалар қалғаны хабарланды.
Полиция қазір залал мөлшерін және оны кім өтеуі тиіс екенін анықтап жатыр.
Еске салайық, бұған дейін Астанада өрт сөндірушілер бес жеңіл көліктің өртін сөндірген. Көліктер Сарайшық ауданындағы тұрғын үй кешенінің жанындағы ашық тұрақта тұтанған.
«Алғашқы өрт бөлімшелері келгенде барлық көлік ашық жалынмен жанып жатқан. Қатты жел салдарынан от қасында тұрған көліктерге тез тарады», — деп хабарлады ТЖМ.