Astanada bazardaǵy satýshylardy jalǵan tólem chekterin kórsetip aldaǵan 34 jastaǵy jergilikti turǵyn ustaldy, dep habarlaıdy infohub.kz saıty.
Kúdikti ádeıi saýda núktelerin aralap, ózin qarapaıym satyp alýshy retinde kórsetken. Kókónis pen jemis tańdap alyp, mobıldi qosymsha arqyly aqsha aýdarǵan bolyp, sodan keıin jalǵan chek kórsetken. Satýshylar aqsha shotqa tústi dep oılap, taýardy bergen.
Bul onyń alaıaqtyq áreketiniń alǵashqy epızody emes ekeni anyqtaldy. Buǵan deıin de kúdikti osy tásilmen birneshe satýshyny aldaǵan. Qazir onyń basqa da osyndaı qylmystarǵa qatystylyǵy tekserilýde.
Osy fakti boıynsha sotqa deıingi tergeý júrgizilýde.
Polısıa satýshylar men kásipkerlerge aqshanyń bank shotyna naqty túskendigi rastalmaıynsha, satyp alýshyǵa taýardy bermeýge keńes beredi.
«Eger siz osy azamattyń zańsyz áreketterinen zardap shekken bolsańyz nemese osyndaı jaǵdaıǵa tap bolsańyz, dereý «102» kanaly arqyly habarlańyz nemese jaqyn mańdaǵy polısıa bólimine júginińiz», — dedi polısıa qyzmetkerleri qazaqstandyqtarǵa.