InfoHub Logo

Astanadaǵy jeńil relsti kólik (LRT) jolaýshylarynyń pikirin bilý úshin tilshimiz "Teatr" stansıasynan "Astana Arena" stansıasyna deıingi baǵytty júrip ótti. Sapar barysynda 20-dan astam jolaýshymen suhbattasý múmkindigi boldy. Olardyń keıbiri baǵanyń 500 teńgege kóterilýine qarsy bolsa, endi biri bul baǵany qolaıly dep sanaıdy.

Bul týraly Infohub.kz aqparat agenttigi habarlaıdy.

Qazirgi tańda LRT-ǵa bılet quny 200 teńge. Alaıda, mamandar Dýbaı men Ystambul tájirıbesin alǵa tartyp, baǵany kóterýdi usynyp otyr. Osyǵan baılanysty, biz jolaýshylardyń oıyn anyqtaýǵa tyrystyq.

Jolaýshylardyń pikiri

Baǵanyń kóterilýine qarsy shyqqandardyń biri: "500 teńge tym qymbat bolady. Jaqynda ǵana ashyldy, áli baǵasyn ornyqtyra qoımaǵan, al qazir kótermekshi", - dedi.

Stýdentter úshin 500 teńge qymbat ekenin aıtqan jolaýshylar da boldy. "Stýdentter úshin 500 teńge qymbat. Ondaıda taksımen júrý áldeqaıda tıimdi bolar edi", - dedi olar.

Zeınetkerler de baǵanyń ósýine alańdaýly. "Zeınetaqy alatyn adamǵa 500 teńge kóp sıaqty. Bul búdjetke aýyr tıedi", - dep pikir bildirdi.

Alaıda, keıbir jolaýshylar 500 teńgelik baǵany qalypty dep sanaıdy. "Bul baǵa maǵan qolaıly sıaqty. Keptelis joq, tez ári yńǵaıly jetýge bolady", - dedi bir suhbattasýshy.

Baǵany kóterý sebebi

Tarıfterdi talqylaýǵa ekonomıkalyq sholýshy Oljas Baıdildınovtiń LRT-ǵa biryńǵaı tarıf júıesin synaǵan málimdemesi sebep boldy. Onyń aıtýynsha, búkil marshrýt úshin 200 teńgelik bekitilgen baǵa ekonomıkalyq turǵydan negizsiz jáne ádiletsiz, sebebi jobanyń operasıalyq shyǵyndaryn da jappaıdy.

Óz kezeginde, LRT júıesin basqaratyn "CTS" kólik kompanıasy da 200 teńgelik tarıftiń shyǵyndardy tolyq jappaıtynyn moıyndady.