Atyraýda ALTYN ORDA halyqaralyq sadaq atý týrnıri ashyldy. Oǵan Qazaqstan men álemniń 18 elinen 200-den astam sadaqshy qatysýda. Qatarlarynda Vengrıa, Ózbekstan, Iran, Úndistan, Koreıa Respýblıkasy, Ulybrıtanıa, Fransıa, Marokko jáne basqa da memleketter bar. Bul týraly infohub.kz saıty habarlaıdy.
Dástúrli sadaq atýdy nasıhattaý, ulttyq sport túrin damytý, sheberlikti shyńdaý jáne halyqaralyq deńgeıde tájirıbe almasý maqsatynda ótip jatqan bul jarys dástúrge aınalǵan.
Týrnırdiń resmı ashylýynda Atyraý oblysynyń ákimi Bolat Aqsholaqov qatysýshylardy quttyqtap, Atyraýda ótetin jarystyń erekshe sımvoldyq mánin atap ótti. «Atyraý — Altyn Orda dáýirimen tikeleı baılanysty, tarıhy tereń qasıetti ólke. Óńirde ornalasqan ejelgi Saraıshyq qalasy ulttyq tarıhta alar orny erekshe. Sondyqtan Atyraýda ALTYN ORDA halyqaralyq sadaq atý týrnıriniń ótýi uly ótkenimiz ben búginimizdi jalǵastyratyn tereń sımvoldyq maǵynaǵa ıe. Bul — jaı ǵana sporttyq jarys emes, tarıhymyzǵa degen qurmet pen ulttyq ónerdiń jańǵyrýynyń tereń belgisi. Bul — Uly dalanyń tiri murasy retinde sadaq atýdy búkil álemge tanytý jolyndaǵy qadamymyz. Búgin óńirde dástúrli sadaq atýdyń materıaldyq-tehnıkalyq bazasyn nyǵaıtý jáne sportshylardy daıarlaýǵa jaǵdaı jasaý boıynsha aýqymdy jumystar júrgizilýde. Basty maqsatymyz — ulttyq sportty damytýǵa qolaıly jaǵdaı jasaý ǵana emes, sonymen qatar Atyraýda álemdik deńgeıdegi jańa chempıondardy tárbıeleý. Sadaqshylarymyzǵa sáttilik, dál tıgizip, jeńiske jetýlerin tileımin! Barshańyzǵa zor densaýlyq pen tabys tileımin», — dedi Bolat Aqsholaqov.
Óńirde dástúrli sadaq atýdy damytýǵa erekshe kóńil bólinýde. Búginde oblysta bul sport túrimen 100-den astam adam turaqty túrde aınalysady. Olardyń qatarynda 2 halyqaralyq dárejedegi sport sheberi, 8 Qazaqstan Respýblıkasynyń sport sheberi jáne 25 sport sheberligine kandıdat bar.
İs-shara aıasynda óńir basshysy VI Dúnıejúzilik kóshpendiler oıyndarynda joǵary nátıje kórsetken Atyraý oblysynyń sportshylaryna alǵys hattar tabys etti. Olardyń qatarynda kókpardan kúmis júldeger Abylaı Ulyqpanov jáne dástúrli sadaq atýdan qola júldeger Álı Sesıgúzel bar.
Jarystyń birinshi kúniniń qorytyndysy boıynsha «Pýta» dısıplınasynda erler men áıelder arasynda irikteý kezeńderi ótti. Erler arasynda úshinshi oryndy Zabıt Satoev ıelense, áıelder arasynda qola júldeni Reseıden kelgen Mıláýsha Halılova jeńip aldy. Erteń sportshylar «Qalqan» dısıplınasynda júldeler úshin kúresti jalǵastyrady.
Jarys 15 qyrkúıekke deıin jalǵasady. Birneshe kún boıy sadaqshylar dástúrli sadaq atýdyń túrli dısıplınalarynda júldelerdi sarapqa salady. Sportshylardyń ónerin halyqaralyq tóreshiler baǵalaıdy.