Atyraýda er adam óndiristegi jazataıym oqıǵa saldarynan qoly men aıaǵynan aıyrylyp, bir jarym jyldan astam ýaqyt boıy kásiporynnan ótemaqy ala almaı júr, dep habarlaıdy infohub.kz saıty.

Almaty TV telearnasyna Galymjan Meırambek aıtqandaı, oqıǵa 2025 jyldyń qańtarynda bolǵan. Kezekti jumys aýysymy kezinde ol vagondardyń arasynda qysylyp qalǵan. Óndiristik jaraqat saldarynan er adam qoly men aıaǵynan aıyryldy. Sodan beri ol tek múgedekter arbasymen qozǵala alady.

Zardap shegýshiniń aıtýynsha, kásiporyn basshylyǵy áýelde barlyq shyǵyndy ótep, qajetti kómek kórsetýge ýáde bergen, alaıda keıin óz ýádesin oryndaýdan bas tartqan. Er adam tıisti ótemaqyny óndirip alýdy talap etýde. Ol jazataıym oqıǵa zaýyttaǵy qaýipsizdik erejeleriniń saqtalmaýynan jumys berýshiniń kinásinen boldy dep sanaıdy.

«17 vagonǵa arnalǵan orynǵa 25 vagon qoıyldy. Marshrýttar durys jasalmady, qaýipsizdik sharalary saqtalmady, sonyń saldarynan men ekinshi toptaǵy múgedek bolyp qaldym. Kompanıa basshylyǵy maǵan alǵashynda: "Biz seni tastamaımyz, kómektesemiz, qolymyzdan kelgenniń bárin jasaımyz" dep berik ýáde berdi. Biraq áli kúnge deıin eshqandaı kómek kórsetilgen joq. Barlyq protezdi jáne t.b. ózim satyp alyp jatyrmyn. Osylaı bola ma?» — dedi qala turǵyny Meırambek Galymjan.

Zardap shegýshiniń advokatynyń aıtýynsha, sot otyrystary barysynda jumys berýshiniń kinási tolyq dáleldengen. Alaıda zaýytta bul sheshimmen kelispeı, apelásıalyq shaǵym túsirgen.

«Barlyq dáleldi sotqa qaraýǵa usyndyq. Olar tolyq rastaldy. Birinshi satydaǵy sot jumys berýshiniń kinási 100 paıyz dep sheshim shyǵardy. Ekinshi tarap óz quqyǵyn paıdalanyp, árıne, apelásıalyq shaǵym berdi. Qazir sol shaǵym boıynsha ádil sheshim kútip otyrmyz», — dep túsindirdi advokat Nurjanat Abýova.

Uıym basshylyǵy jaǵdaıdy túsindirýden bas tartty. Aıta keteıik, sot sheshimine deıin tergeýdi eńbek ınspeksıasy júrgizgen. Inspeksıa qorytyndysy boıynsha, jumysshynyń ózi de aýysymda qatelik jibergen.

«Qańtar-aqpan aılarynda arnaıy komısıa qurylyp, tergeý júrgizdi. Sonda jumysshynyń kinási 70 paıyz dep belgilendi. Alaıda mamandandyrylǵan ákimshilik sottyń sheshimimen bul qorytyndy joıylyp, jumys berýshiniń 100 paıyz kinási anyqtaldy», — dedi Atyraý oblysy boıynsha memlekettik eńbek ınspeksıasy komıteti departamentiniń basshysy Kemel Imangalıev.

Endi taǵy bir sot otyrysy ótedi. Galymjan Meırambektiń aıtýynsha, ol sońyna deıin kúresip, ádildikke jetýdi kózdep otyr.