2026 jylǵy jaz mezgilinde Qazaqstannyń aqyly joldarynda 25,8 mln-nan astam júris tirkeldi. Eń suranysqa ıe baǵyt Almaty – Qonaev ýchaskesi boldy, dep habarlaıdy infohub.kz saıty.
«QazAvtoJol» UK» AQ derekterine sáıkes, úsh jaz aıynda 28 aqyly ýchaskede 25 818 167 júris tirkelgen. Táýligine orta eseppen shamamen 281 myń júris qyzmet kórsetilgen.
Qozǵalys qarqyndylyǵy boıynsha kósh bastaǵan Almaty – Qonaev ýchaskesi: jaz boıy munda 4,31 mln júris sanalǵan. Ekinshi orynda – Shymkent – Ózbekstan shekarasy, 2,68 mln júris. Úshinshi satyda Shymkent – Taraz ýchaskesi tur, munda 1,87 mln júris tirkelgen.
Eń júktelgen baǵyttardyń ondyǵyna sondaı-aq Taraz – Qaınar (1,82 mln), Astana – Temirtaý (1,49 mln), Astana – Shýchınsk (1,46 mln), Shymkent – Qyzylorda (1,41 mln), Qonaev – Taldyqorǵan (1,20 mln), Shýchınsk – Kókshetaý (1,06 mln) jáne Taraz aınalma joly (Qaınar – Shymkent) 945,7 myń júrispen endi.
Eń suranysqa ıe on aqyly ýchaskege 18,2 mln-nan astam júris tıesili boldy — bul jazǵy trafıktiń shamamen 71%-y.
«QazAvtoJolda» qozǵalys qarqyndylyǵy iri qalalar arasyndaǵy baǵyttarǵa da, týrısik jáne rekreasıalyq aımaqtarǵa bastaıtyn baǵyttarǵa da suranystyń joǵary ekenin kórsetetinin atap ótti. Suranysqa ıe baǵyttardyń qatarynda, atap aıtqanda, Almaty – Qonaev, Astana – Shýchınsk, Shýchınsk – Kókshetaý, Qaraǵandy – Balqash, Qyzylorda – Aral jáne Úsharal – Dostyq trassalary bar.
Kompanıada avtomobıl júristeriniń artýyn jol ınfraqurylymynyń damýymen de baılanystyrady. Qoljetimdiligi artqan óńirler, jol ýaqytynyń qysqarýy jáne qaýipsizdiktiń joǵarylaýy ishki týrızmge jaǵdaı jasaıdy.
Sonymen qatar respýblıkalyq joldar boıynda jol mańy ınfraqurylymy keńeıip keledi. Qazir shamamen 1,5 myń servıs nysany jumys isteıdi, olardyń qatarynda janarmaı quıý stansıalary, tamaqtaný pýnktteri, qonaqúıler, demalys alańdary jáne sanıtarlyq nysandar bar. Elektromobılderge arnalǵan ınfraqurylym da birtindep damyp keledi: respýblıkalyq trassalar boıynda 60-tan astam qýattaý stansıasy jumys istep tur.
«QazAvtoJolda» joldardyń damýy tek kólik qatynasyna áser etpeıtinin sanaıdy. Avtomobıl trafıginiń ósýi týrızm men shaǵyn bızneske, onyń ishinde jol mańyndaǵy jańa servıs nysandary esebinen qosymsha múmkindikter týǵyzady.