Baıqońyrda bóten múlikti qasaqana joıý týraly qylmystyq is Qazaqstannyń quqyq qorǵaý organdaryna jiberildi, dep habarlaıdy infohub.kz saıty.
«Baıqońyr» kesheni prokýratýrasynyń resmı Telegram-arnasynda jazylǵandaı, qadaǵalaý organy 46 jastaǵy jergilikti turǵynǵa qatysty materıaldardy ári qaraı tergeýdi uıymdastyrý úshin qalalyq prokýratýraǵa joldady. Er adamdy Reseı Federasıasynyń Qylmystyq kodeksiniń 167-babynyń 2-bóliginde kózdelgen qylmys — órteý arqyly bóten múlikti qasaqana joıý nemese búldirý boıynsha aıyptaıdy.
Tergeý derekterine sáıkes, aǵymdaǵy jyldyń shildesinde aıyptalýshy men onyń jubaıy arasynda turmystyq janjal bolǵan. Kópqabatty úıdiń aýlasynda turǵan er adam ókpeleý sezimimen jubaılardyń ortaq menshigindegi, nekede satyp alynǵan Chevrolet kóligin órtep jibergen. Qylmystyq oıyn júzege asyrý úshin ol kólik salonyna tutanǵysh suıyqtyq quıyp, sirińkemen tutandyrǵan.
Bul áreketter kólikti qalpyna keltirý múmkindiginsiz aıtarlyqtaı zaqymdaýǵa ákep soqty. Múlik jubaılardyń ortaq menshiginde bolǵandyqtan, azamat óz áreketimen otbasyna 800 myń rúblden astam, ıaǵnı 4,2 mln teńge shyǵyn keltirgen.
Qylmystyq jaýapkershilikke tartylyp otyrǵan adam Qazaqstan Respýblıkasynyń azamaty bolǵandyqtan, qylmystyq is qazaqstandyq quqyq qorǵaý organdaryna berildi.
Qazaqstan Respýblıkasynyń Qylmystyq kodeksinde bul qylmys úshin eń joǵary jaza — jeti jylǵa deıin bas bostandyǵynan aıyrý. Al eger atalǵan áreket erekshe iri shyǵyn keltirse nemese abaısyzda adam ólimine ákep soqsa, baptyń sanksıasy on jylǵa deıin bas bostandyǵynan aıyrýdy kózdeıdi.