Қарағанды облысында 26 қыркүйекте Балқаш көлінде балық аулап жүріп суға кеткен ер адамның денесі табылды, деп хабарлайды infohub.kz сайты.
Ekaraganda.kz жазуынша, іздеу жұмыстары Қарағанды облысының Ақтоғай ауданында аяқталды. Қайғылы оқиға 26 қыркүйекте Тасарал ауылынан шамамен 20 шақырым жерде болған: балық аулау кезінде 1970 жылы туған ер адам суға кеткен. Хабар түскен соң оқиға орнына Қарағанды облысы Төтенше жағдайлар департаментінің күштері мен құралдары жіберілді.
«Бірнеше күн бойы жедел-құтқару жасағының құтқарушылары су айдынын тексерді. Іздеу үшін сүңгуір жабдықтары, сондай-ақ су астындағы телебасқарылатын тексеру кешені пайдаланылды. Жұмыстар жарық уақытта жүргізілді. Ер адамды тек қазір табу мүмкін болды. Құтқарушылар жергілікті тұрғындармен бірлесіп, көлді балық аулайтын аумен тексерді. Жағадан 2,5 шақырым жерде, шамамен 4-5 метр тереңдікте қаза тапқан адамның денесі табылды. Ол судан алынды», — делінген жарияланымда.
Төтенше жағдайлар департаментінің мәліметінше, іздеу жұмыстарына ауа райы кедергі келтірген: көлде қатты жел мен биік толқын байқалған.