Soltústik Qazaqstan oblysynda esepte turǵan sottalǵan adam dostarymen balyqqa baryp, sońynda bostandyǵynan aıyryldy, dep habarlaıdy infohub.kz.
Óńirdegi QAJD baspasóz qyzmetiniń málimetinshe, probasıalyq baqylaýdyń zamanaýı tehnologıalary ınspektorǵa habarlamaı turǵylyqty jerinen ketken sottalǵannyń ornalasqan jerin jedel anyqtaýǵa múmkindik berdi.
Buǵan Tımırázev aýdanynyń 35 jastaǵy turǵyny, probasıa qyzmetiniń esebinde turǵan adam kóz jetkizdi. Buǵan deıin ol mas kúıinde kólik júrgizgen dosyn jasyrýǵa tyrysyp, jalǵan aıǵaq bergeni úshin bas bostandyǵyn shekteý jazasyna sottalǵan.
Jazasyn óteý kezeńinde ol birneshe ret tártip buzǵan. Osyǵan baılanysty oǵan elektrondy baqylaý ornatylǵan.
Probasıa qyzmetiniń qyzmetkerleri tekserý úshin onyń úıine kelgen, alaıda sottalǵan adam ornynda bolmaǵan.
Elektrondyq baqylaý quraly men «Sıfrlyq probasıa» mobıldi qosymshasynyń derekteriniń arqasynda qyzmetkerler onyń qozǵalys baǵyty men naqty ornalasqan jerin anyqtady. Inspektorlar kórsetilgen geolokasıaǵa dereý jetip, er adamdy basqa aýyldan tapty — ol dostarymen balyqqa ketken eken.
Inspektorǵa habarlamaı jáne tıisti ruqsatsyz óz betinshe ketý jazany óteýdiń belgilengen sharttaryn taǵy da buzý boldy.
Aldyńǵy buzýshylyqtardy eskere otyryp, probasıa qyzmeti bas bostandyǵyn shekteýdi bas bostandyǵynan aıyrýmen aýystyrý máselesin sheshý úshin materıaldardy sotqa jiberdi.
Nátıjesinde sot taǵaıyndalǵan jazany aýystyrý týraly sheshim qabyldady. Er adam 3 jyl 6 aıǵa bas bostandyǵynan aıyrylady.