Qazaqstandyq «Barys» Kontınenttik hokeı lıgasynyń 2026/27 maýsymyndaǵy turaqty chempıonatynda alǵashqy jeńilisin aldy: Astanada Mıhaıl Kraves shákirtteri týrnırdiń úshinshi machynda habarovskilik «Amýrǵa» 1:3 esebimen jol berdi, dep habarlaıdy infohub.kz saıty.

Qarsylastar aǵymdaǵy maýsymda buǵan deıin de kezdesken. Bashqurtstan Respýblıkasy kýbogy aıasyndaǵy maýsym aldyndaǵy týrnırde astanalyqtar «Amýrǵa» 1:5 esebimen utylǵan. Ýfadaǵy týrnırdiń kýbogy túbinde habarovskilikterge buıyrdy, al qazaqstandyqtar sońǵy orynǵa turaqtady.

QHL bastalǵanda komandalardyń róli aýysty. «Barys» óz alańyndaǵy eki machynda jeńiske jetip, «Sıbır» men «Salavat Iýlaev» qaqpasyna 15 shaıba soqty. «Amýr» syrt alańdaǵy úsh kezdesýinde bar-joǵy úsh gol soǵyp, «Metalýrgke» (2:4 jáne overtaımda 1:2) jáne sol «Sıbırge» (0:2) utyldy.

QHL-2026/27. Shyǵys konferensıasy. 12 qyrkúıek.

🏒 BARYS (Astana, Qazaqstan) – AMÝR (Habarovsk, Reseı) 1:3 (0:1, 1:1, 0:1)

Goldar: Lıhachev (Voınov, Pılıpenko) 09:46-kópshilikte (0:1), Shvarev (Lýkın, Fılatev) 30:02 (0:2), Pılon (Beılı) 32:44 (1:2), Petkov 59:54-bos qaqpaǵa (1:3).

Mach aldyndaǵy boljamdardy rastaı otyryp, «Barys» kezdesýdiń basynda belsendirek kórindi. 19:7 – birinshi kezeńde alań ıeleri jıi alańnan qýylǵan qonaqtardan osylaısha basym tústi (aıyppul ýaqyty 7:13). Alaıda jalǵyz goldy Qıyr Shyǵys ókilderi soqty. Birinshi kezeńniń ortasynda kópshilikte Iaroslav Lıhachev kózge tústi.

Turaqty chempıonatta alǵash ret esepte artta qalǵan «Barys» ekinshi kezeńde de óz jelisinde boldy. Biraq tarıh derlik qaıtalandy. Laqtyrýlar boıynsha 21:14, esep boıynsha 1:1. Habarovskilik Artem Shvarevtiń shaıbasyna Garret Pılon jaýap berdi – 1:2.

Úshinshi kezeńde QHL-daǵy 450-machyn ótkizgen Mıhaıl Kraves shákirtteri aınalymdy báseńdetpedi. Biraq bul joly goldyq sátterdi paıdalaný sátsiz boldy. Maksım Dorojko qaqpasyna 6h4 formatyndaǵy aqtyq shabýyl da nátıje bermedi. Onyń ústine qonaqtar bos qaqpaǵa shaıba soqty.

«Barys» chempıonattaǵy alǵashqy jeńilisin aldy – 1:3.

5 qyrkúıekte bastalǵan QHL turaqty chempıonaty 2027 jyldyń 20 naýryzyna deıin jalǵasady. 22 komandanyń árqaısysy 68 oıyn ótkizedi. Turaqty chempıonat qorytyndysy boıynsha ár konferensıadan 8 komanda pleı-offqa qatysý quqyǵyna ıe bolady. Gagarın kýbogynyń qazirgi ıegeri – mamyrdaǵy fınaldyq serıada Qazannyń «Aq Barsyn» alty machta jeńgen ıaroslavskilik «Lokomotıv».

Týrnır basynda «Barys Arenada» úsh ret oınaǵan astanalyqtar Toláttı – Magnıtogorsk – Iaroslavl – Máskeý baǵyty boıynsha týrnege attanady.