Astananyń «Barysy» Kontınentaldy hokeı lıgasynyń (KHL) turaqty chempıonatyndaǵy syrtqy machta Magnıtogorskiniń «Metalýrginen» jeńilis tapty. Magnıtogorskide ótken kezdesý 3:0 esebimen alań ıeleriniń jeńisimen aıaqtaldy, dep habarlaıdy infohub.kz saıty.
Oıynnyń taǵdyry birinshi kezeńde-aq sheshilgendeı boldy. «Metalýrg» hokeıshileri jeti mınýt ishinde astanalyq komandanyń qaqpasyna úsh shaıba soqty.
Qazaqstan quramasynyń shabýylshysy Nıkıta Mıhaılıs soqqan úshinshi shaıbadan keıin «Barystyń» bas bapkeri Mıhaıl Kraves qaqpashy Hanter Shepardty aýystyrýǵa sheshim qabyldady. Onyń ornyna alańǵa Andreı Shýtov shyqty.
Ekinshi jáne úshinshi kezeńderde qazaqstandyq klýb aıyrmashylyqty qysqarta almady. Alań ıeleri de kózge túspedi, úsh shaıbalyq basymdyqty sońǵy ysqyryqqa deıin saqtap qaldy.
Osylaısha, «Barys» 0:3 esebimen qurǵaq jeńiliske ushyrady.
Astanalyq komanda kelesi machyn 20 qyrkúıekte Iaroslavlde jergilikti «Lokomotıvke» qarsy ótkizedi. Kezdesý 19:00-de bastalady.