InfoHub Logo

Men óz qolyma aqsha ustamaıtyn jannyń birimin. Tapqan-taıanǵanymdy ákelgen boıda jubaıymnyń aldyna tastaı salam.
 – Sabyr etshi, myna aqshalardy eseptep, qalaı jaratýdy aqyldasyp alaıyqshy...
 – Balalar seniki, baı seniki, úı seniki ... basymdy qatyrma, maǵan deseń órtep jiber!
 – Áıel úı qojasy, odan basqa eshkim bizdiń semáda aqsha ustamaıdy.
 – Mama –ý nassamyı glavnyı chelovek, – deıdi kenje qyzym.
 – Durys aıtasyń, balam, – dep men ony qostap qoıamyn. Moskvany kórsin dep bıyl jazda balalardy alyp bardyq. Kreml, MGÝ, Tretákov galereıasynda bolyp, astananyń taǵy basqa da maqtaýly oryndaryn aralap, balalar bir jasap qaldy.
Maqpal –sábı, Shapýlka bolsa boıjetken qyz bala. Bir kúni keshke Kremldiń Sıezer Saraıyna teatrǵa bılet alyp keldim.
 – Kishkentaımen ekeýiń úıde qalasyńdar, biz Shapýlka ekeýmiz baramyz, – dedi jubaıym maǵan.
 – Men nege barmaımyn, – dep shataq shyǵardy Maqpal.
 – Janym-aý, ol jerge sábıler men shaldardy jibermeıdi eken, men shalmyn, sen áli balasyń, ekeýmiz úıde qalatyn boldyq.
Maqpal basqa túsken sharasyzdyqqa kóngendeı bop, buryshqa baryp muńaıyp otyrǵan-dy. Men aıap ketip qasyna baryp, basynan sıpaǵan soń, kishkentaı qyzym:
 – Baıǵus polkovnık, – dep meni aıaǵandaı bolmasy bar emes pe. –Bar aqsha mamamda. Ol bizge aqsha da bermeıdi, Kremlge de jibermeıdi.
Men rahattana qarqyldap kúlip, kishkentaı qyzymdy kóterip ap, betinen súıdim; ol meni aımalap:
 – Baıǵus polkov-nık!... – dep kúrsindi.

---