Sent-Lýıste (AQSh) ótip jatqan áıelder arasyndaǵy Cairns Cup-2026 sýpertýrnıriniń altynshy týrynda qazaqstandyq grosmeıster Bıbısara Asaýbaeva qaramen oınap, amerıkalyq halyqaralyq sheber Karıssa Iıppen teń oınady. Kezdesý kúrdeli shahmat jarystary úshin sırek kezdesetin nátıjemen aıaqtaldy: taqtada tek eki kоról qaldy, dep habarlaıdy infohub.kz.
Endshpılde Asaýbaeva eki peshkanyń birin ferzge jetkizýge tyrysty, alaıda aqtardyń pili men koroli teńdikti saqtap qaldy. 59-shy júriste eki jaqtyń da fıgýralary aıyrbastalyp, qarsylastar tek kоróldermen qalyp, kelisimge keldi.
Bul kezde taǵy bir amerıkalyq qatysýshy, halyqaralyq sheber Elıs Lı qaramen úndistandyq shahmatshy Hampı Konerany jeńip, Asaýbaeva bastaǵan qýýshylar tobynan ozyp ketti. Úsh sońǵy týr aldynda 16-shy álem chempıony (2017–2018) qytaılyq Tan Chjýnı kósh bastap tur.
Qatarynan eki partıany qaramen oınaǵan qazaqstandyq kelesi týrda aqpen oınaıdy. Júldeli orynǵa úmitker bolý úshin Asaýbaevaǵa Stavrýla Solakıdany jeńý qajet. Grekıalyq halyqaralyq sheber de, Bıbısara da Sent-Lýıste áli jeńilmegen.
Júlde qory 250 000 dollardy quraıtyn bedeldi áıelder sýpertýrnıri Cairns Cup AQSh shahmatynyń qasıetti orny — Sent-Lýıste (Mıssýrı shtaty) ótýde. Týrnır Sent-Lýıs shahmat klýbynyń negizin qalaýshylardyń biri, álemdik shahmat dańq zalyna kiretin Djınn Kerns Sınkfıldtiń qurmetine atalǵan.
Uıymdastyrýshylardan jeke shaqyrtý alǵan on shahmatshy bir aınalymda oınaıdy. Ýaqyt baqylaýy klasıkalyq: 40 júriske 90 mınýt, sodan keıin partıa sońyna deıin 30 mınýt, ár júriske birinshiden bastap 30 sekýnd qosylady.
Sent-Lýıste qatar erler týrnıri — Sinquefield Cup-2026 de ótýde, ol da Djınn Kerns Sınkfıldtiń qurmetine atalǵan. Júlde qory 475 000 dollar bolatyn jarysqa shahmat tájine úmitker, bizdiń Asaýbaevanyń jigiti Javohır Sındarov qatysýda. Demalys kúninen keıin ózbek shahmatshysy aqpen oınap, týrnırdiń reıtıńtik favorıti amerıkalyq Fabıano Karýanamen teń oınady. Teńdik 42-shi júriste tirkeldi.