Qyrǵyzstan astanasyndaǵy «Bishkek-Arena» stadıonynda VI Dúnıejúzilik kóshpendiler oıyndarynyń saltanatty ashylý rásimi ótti. Jıynǵa 50 myńnan astam kórermen jınaldy, dep habarlaıdy infohub.kz.
Sharaǵa 17 memlekettiń prezıdentteri qatysty. Qazaqstan týyn kóterý qurmeti ulttyq qurama kapıtany, kókpardan álem chempıony Turǵanbek Qurmanbekke júkteldi.
Oıyndarda Qazaqstan quramasyn 152 sportshy tanystyrady. 43 sport túrinen jarystar 1 qyrkúıekte bastalyp, úsh sport nysanynda jáne Sholponatadaǵy Qyrshyn jaılaýynda ótedi.
Baǵdarlamaǵa kókpar, kók-bóri, qazaq kúresi jáne basqa da ulttyq dısıplınalar engizilgen. Jarystardyń bir bóligi Qazsport telearnasynda tikeleı efırde kórsetiledi.
Qazaqstan Týrızm jáne sport mınıstrligi Sport jáne dene shynyqtyrý isteri komıteti respýblıkada 11 ulttyq sport túri basym baǵytqa jatqyzylyp, olımpıadalyq túrlermen teńestirilgenin eske saldy. Olar: qazaq kúresi, toǵyzqumalaq, kókpar, aýdaryspaq, jamby atý, báıge, teńge ilý, qus salý, asyq atý, dástúrli sadaq atý jáne jekpe-jek.
Buǵan deıin Qazaqstan Prezıdenti Qasym-Jomart Toqaev Bishkekte ótken VI Dúnıejúzilik kóshpendiler oıyndarynyń resmı ashylý rásimine qatysqany habarlanǵan bolatyn. Oıyndar Qyrǵyzstanda 31 tamyz ben 6 qyrkúıek aralyǵynda ótip, oǵan 100-den astam elden 3 myńǵa jýyq sportshy qatysýda.