Brıtandyq oqýshy qyz Bodhana Sıvanandan 11 jasynda álemdik rekord ornatyp, shahmat tarıhyndaǵy eń jas áıel grosmeıster (WGM) atandy. Bul ataqqa qajetti nátıjeni ol Samarqandta ótken Dúnıejúzilik shahmat olımpıadasynda kórsetti, dep habarlaıdy infohub.kz saıty.
Olımpıadada Sıvanandan Anglıa quramasy sapynda oınap, barlyq 11 partıany birinshi taqtada ótkizip, 8 upaı jınady. Bul nátıje grosmeıster ataǵyn alýǵa jetkilikti boldy. Sol kezde onyń reıtıńi 2300-den asqan edi.
Buǵan deıingi rekord Katerına Lagnoǵa, odan buryn Hoý Ifanǵa tıesili bolǵan. Eki shahmatshy da áıel grosmeıster ataǵyn 12 jasynda alǵan.
Aıta keteıik, WGM tıtýly qyz úshin taǵy bir aýyz toltyryp aıtarlyqtaı jetistik qana boldy. Ótken jyly 10 jasynda ol grosmeısterdi jeńgen eń jas shahmatshy atandy. Al shildede ol halyqaralyq sheberdiń alǵashqy normasyn oryndap, sol kezde muny birinshi bolyp baǵyndyrǵan eń jas áıel boldy.
Atap ótsek, Bodhana shahmatqa koronavırýs pandemıasy kezinde kelip, óz betinshe oınaýdy úırengen. 2021 jyldyń shildesinde ol Ulybrıtanıanyń eń kóne shahmat klýbtarynyń biri — Harroý klýbynda alǵashqy týrnırin oınady. Bir jyldan keıin, jeti jasynda, ol mektep oqýshylary arasyndaǵy Eýropa chempıonatynda barlyq 24 partıany utyp aldy.
2023 jyly Sıvanandan resmı partıada grosmeıstermen teń túsken eń jas oıynshy atandy. Taǵy bir jyldan keıin, toǵyz jasynda, ol Anglıa quramasy sapynda shahmat olımpıadasynda alǵash ret óner kórsetti. Sol kezde ol kez kelgen sport túrinen halyqaralyq jarystarda el namysyn qorǵaǵan eń jas oıynshy boldy. Sonymen qatar qyz mektepte oqýyn jalǵastyryp, bir mezgilde halyqaralyq týrnırlerge qatysyp júr.
Buǵan deıin Kursiv LifeStyle Qazaqstan áıelder shahmatyn damytqany úshin FIDE nagradasyn alǵanyn jazǵan bolatyn.