Qazaqstannyń birinshi raketkasy Aleksandr Býblık Kásipqoı tenısshiler qaýymdastyǵynyń (ATP) jańartylǵan reıtıńinde bir orynǵa tómendep, 17-orynǵa tústi. Ulttyq quramanyń jattyqtyrýshylar shtaby ony Taıland komandasyna qarsy Devıs kýbogy machyna qatystyrmaýǵa sheshim qabyldady, dep habarlaıdy infohub.kz saıty.

Qazaqstandyq tenısshiniń AQSh ashyq chempıonatyndaǵy ónerin sátti dep ataýǵa kelmeıdi. Úlken dýlyǵa týrnıriniń úshinshi aınalymynda Býblık bes sette AQSh ókili Tom Polǵa (21-seben) — 4:6, 6:3, 7:6 (7:4), 1:6, 3:6 esebimen jol berdi. Ótken jylǵy upaılaryn qorǵaı almaǵan qazaqstandyq reıtıńte 17-jolǵa tómendedi, al jaqynda ǵana úzdik ondyqqa kirgen edi.

1300 upaı joǵaltqanyna qaramastan, álemniń birinshi raketkasy bolyp Nú-Iorkte jaraqatyna baılanysty oınamaǵan ıtalıalyq Iannık Sınner qaldy. AQSh ashyq chempıonatynyń jańa jeńimpazy Aleksandr Zverev ekinshi oryndy saqtap qaldy, alaıda onyń jartylaı fınalda Ben Sheltonǵa jol bergen ıspanıalyq Karlos Alkarastan aıyrmashylyǵy aıtarlyqtaı ósti.

Amerıkalyq tenısshiniń ózi mansabynda alǵash ret 4-orynǵa kóterildi. Osy jerde bıylǵy naýryzda Sheltonnyń Maıamıde qazaqstandyq Aleksandr Shevchenkoǵa — 7:6 (7:3), 6:7 (3:7), 3:6 esebimen jol bergenin eske túsirgen jón.

Taılandqa qarsy aldaǵy Devıs kýbogy machynda Qazaqstan quramasynyń birinshi nómiri dál sol Aleksandr Shevchenko bolady. Komanda kapıtany Dıas Doskaraev quramdy jarıalap, oǵan Shevchenkodan bólek Tımofeı Skatov, Denıs Evseev, Beıbit Juqaev jáne Ámir Omarhanov engenin aıtty. Ol Býblıktiń shaqyrtylmaýyn bylaı túsindirdi:

«Quramdy qalyptastyrý kezinde birneshe faktordy eskerdik. Árıne, aldaǵy machta jeńiske jetý mindeti tur. Sonymen qatar mundaı kezdesýlerdi quramdy keńeıtý jáne basqa tenısshilerge oıyn tájirıbesin berý úshin paıdalanýdy mańyzdy dep sanaımyz. Sondyqtan bul joly komandany Aleksandr Býblıksyz oınatýǵa sheshim qabyldadyq. Aleksandr quramamyzdyń kóshbasshylarynyń biri bolyp qala beredi, onyń qatyspaýy basqa oıynshylardy tartý jáne komandanyń tereńdigin birtindep arttyrý jónindegi sheshimimizge baılanysty».

Qazaqstan — Taıland machy 18–19 qyrkúıekte Astanada hard kortynda ótedi.

Shevchenko men Skatov, sirá, jekelegen kezdesýlerde oınaıdy. Juptar quramy ázirge belgisiz. Eldiń reıtıńi boıynsha úzdik jup oıynshysy Grıgorı Lomakın Taılandqa qarsy machqa shaqyrtylmady.